Վրաստանը և Ռուսաստանը համաձայնության են եկել ավիաչվերթների հաճախականության շուրջ

Վրացական և ռուսական կողմերն ավարտել են երկու երկրների միջև տեխնիկական կոնսուլտացիաներն ավիափոխադրումների հաճախականության ու աշխարհագրական ընդգրկման շուրջ և հասել են համաձայնությունների: Այդ մասին, ինչպես տեղեկացնում Է «Արմենպրես»-ը, ապրիլի 15-ին հաղորդել Է «Նովոստի Գրուզիա»-ն՝ հղում անելով Վրաստանի տնտեսության և կայուն զարգացման նախարարության մամուլի ծառայությանը:

«Բացի «Թբիլիսի-Մոսկվա» չվերթից, համաձայնություն Է ձեռք բերվել Վրաստանի և Ռուսաստանի Դաշնության մյուս քաղաքների միջև կանոնավոր օդային հաղորդակցությունը վերսկսելու շուրջ»,-ասված Է հաղորդագրության մեջ:

Մասնավորապես, վրացական ավիափոխադրողները կանոնավոր չվերթներ կիրականացնեն Ռուսաստանի յոթ քաղաքների՝ Մոսկվայի, Սանկտ Պետերբուրգի, Սամարայի, Եկատերինբուրգի, Սոչիի, Միներալնիե Վոդիի և Ռոստովի ուղղությամբ: Ինչ վերաբերում Է ռուսական ավիաընկերություններին, ապա նրանք կթռչեն Թբիլիսի, Բաթում և Քութայիս:

«Ըստ ձեռք բերված համաձայնության՝ «Մոսկվա-Թբիլիսի» օդային ուղեգծով թռիչքները կիրականացվեն յուրաքանչյուր կողմի համար 18 հաճախականությամբ՝ ձմեռային նավագնացության տարեշրջանում և 21 հաճախականությամբ՝ ամառային նավագնացության տարեշրջանում»,-նշված Է հաղորդագրության մեջ:

ՌԴ-ի և Վրաստանի միջև կանոնավոր ուղղակի ավիահաղորդակցությունը չեղյալ Էր հայտարարվել 2006 թվականին երկու երկրների միջև հարաբերությունները սրվելուց հետո, այնուհետև որոշ ժամանակով վերականգնվել Էր 2008 թվականին, իսկ հետո կրկին ընդհատվել օգոստոսյան իրադարձություններից և երկրների միջև դիվանագիտական հարաբերությունների խզումից հետո:

Կանոնավոր ավիահաղորդակցությունը վերսկսելու մասին որոշումն ընդունվել Է 2014 թվականի սեպտեմբերին: Դրանից հետո կանոնավոր ավիաչվերթներ են իրականացնում չորս ավիաընկերություններ: Դրանցից երեքը ռուսական են՝ «Սիբիր»-ը, «Տրանսաերո»-ն և «Աերոֆլոտ»-ը, իսկ մեկը՝ Airzena - Georgian Airways-ը՝ վրացական: