Նյու Յորքում ոստիկանական բռնության դեմ ցույցի ժամանակ կալանավորվել է 34 մարդ

Նյու Յորքի իրավապահները նախօրեին կալանավորել են 34 մարդու ոստիկանական բռնության դեմ ցույցի ժամանակ անկարգությունների համար, տեղեկացնում է The New York Times-ը:

Ցուցարարները որպես բողոք` դուրս են եկել քաղաքի փողոցներ` ի նշան ոստիկանների կողմից աֆրոամերիկացիների սպանության:

Բողոքի ակցիան սկսվել է Մանհեթենի գլխավոր հրապարակներից մեկում` Յունիոն սքվերում: Սկզբում մասնակցել է մոտ 400 մարդ, որոնք ուղևորվել են Մանհեթենի ոստիկանական տեղամաս: Ապա ցուցարարներն անցել են Բրուքլինի կամրջով` խանգարելով երթևեկությանը:

The New York Times-ը հայտնում է ոստիկանների վրա հարձակումների մի քանի դեպքի մասին:

Ականատեսները պնդել են, որ իրավապահները անկարգության մասնակիցներին մտցրել են ոստիկանական ֆուրգոնները: