Ուկրաինական ճգնաժամը Եվրոպայի համար ամենամեծ սպառնալիքն է դարձել «սառը պատերազմի» ժամանակներից ի վեր. ԵԱՀԿ

Ուկրաինական ճգնաժամը «սառը պատերազմի» ժամանակներից ի վեր ամենամեծ սպառնալիքն է դարձել եվրոպական անվտանգության համար: Այդ մասին, ինչպես տեղեկացնում է «Արմենպրես»-ը՝ հղում անելով ՏԱՍՍ-ին, հայտարարել է ԵԱՀԿ-ի ներկայացուցիչ Մարսել Պեշկոն՝ միջազգային անվտանգության հարցերին նվիրված չորրորդ Մոսկովյան խորհրդաժողովում հրապարակելով կազմակերպության գլխավոր քարտուղարի ուղերձը:

«Այս տարի Մոսկովյան խորհրդաժողովն անցնում է «սառը պատերազմի» ժամանակներից ի վեր եվրոպական անվտանգության վատթարագույն ճգնաժամի ֆոնին: Անտարակույս, կասկածի տակ է դրվում անվտանգության համակարգի հիմնարար սկզբունքը: Անվստահությունը և առճակատման քաղաքականությունը հանգեցնում են այն բանին, որ վնասվում է անվտանգության սկզբունքը, որը ԵԱՀԿ-ի «սիրտն» է»,-ասել է Պեշկոն:

Ինչպես ԵԱՀԿ-ի դիտորդները հայտնել են կազմակերպության կայքում հրապարակված հաշվետվության մեջ, Ուկրաինայի արևելքում հակամարտության կողմերը չեն ավարտել անվտանգության գոտուց ծանր սպառազինությունների հետքաշումը, չնայած հնչող հրապարակային հայտարարություններին: Բացի այդ, նրանց տվյալներով, ինչպես Կիևի, այնպես էլ ինքնահռչակ Դոնեցկի Ժողովրդական Հանրապետության կողմից հետքաշված տեխնիկայի մի մասը տեղափոխվել է դրանց գտնվելու վայրերից:

Ապրիլի 16-ին Մոսկվայում բացվել է միջազգային անվտանգության հարցերին նվիրված չորրորդ միջազգային խորհրդաժողովը, որը կազմակերպել է ՌԴ-ի պաշտպանության նախարարությունը:

Պաշտպանության նախարարությունը խորհրդաժողովին հրավիրել է շուրջ 80 երկրների ներկայացուցիչների, ներառյալ ՆԱՏՕ-ի բոլոր անդամները, ինչպես նաև Հյուսիսատլանտյան դաշինքի ղեկավարությունը: Սակայն դաշինքի զորահրամանատարների մեծամասնությունը նախընտրել է չժամանել Մոսկվա. պաշտպանության նախարարի մակարդակով ներկայացված է միայն Հունաստանը:

Այդուհանդերձ, խորհրդաժողովին ժամանել են տարբեր երկրների ռազմական գերատեսչությունների մեկ տասնյակից ավելի ղեկավարներ, առավելապես ասիական երկրներից, մասնավորապես, Չինաստանից, ԿԺԴՀ-ից, Ինդոնեզիայից, Իրանից և Պակիստանից: Բարձր մակարդակով ներկայացված են նաև Հավաքական անվտանգության պայմանագրի կազմակերպության գծով Ռուսաստանի դաշնակիցները:

Համաժողովի հիմնական թեման է՝ «Գլոբալ անվտանգությունը. մարտահրավերներ և հեռանկարներ»: