Անկախություն եք թողե՞լ, որ գնահատենք...

Վերլուծական 15 Սեպտեմբեր, 2017 16:30

Ազգային ժողովի նախկին նախագահ, ՀՀԿ խմբակցության պատգամավոր Գալուստ Սահակյանը խոստովանում է, որ երկրից արտագաղթում են իշխանությունից հիասթափվելու պատճառով։ Չնայած այս համոզմունքին՝ Սահակյանը պնդում է, որ ՀՀԿ-ն պետք է շարունակի ղեկավարել, իսկ երկրի կառավարումը ուղղորդի Սերժ Սարգսյանը։ Լրագրողների հարցին՝ արդյո՞ք դա չի նշանակում, որ եւս 350 հազար քաղաքացի է արտագաղթելու Հայաստանից՝ ինչպես եղել է վերջին տասը տարվա ընթացքում, Գալուստ Սահակյանը պատասխանեց․ «Դա մի այլ թեմա է, որի մասին կարելի է խոսել. մի երկու բառով ասեմ՝ մեր ժողովուրդը նոր տեսավ ամբողջ աշխարհը եւ կարողացավ իր որդիներով ու բարեկամներով տեսնել։ Մեր ժողովուրդը դեռ չի հասկացել՝ անկախությունն ինչ բան է, ինչի համար է ինքը պայքարում։ Այսօրվա ժողովուրդը տպավորված չէ՝ անկախ երկիրն ինչ է, ինչի համար է, բոլորը մտածում են՝ իրենց որդիները դառնան մեծահարուստներ, գիտնականներ, ինժեներներ»։

Ի՞նչ է ստացվում՝ տոտալ կերպով արտագաղթում ենք, որովհետև ազգովի ճամփորդելու մոլուցք ունենք ու ընդհանրապես շատ անշնորհակալ ազգ դուրս եկանք: Գալուստ Սահակյանը և նրա թիմակիցները երկար ու ձիգ տարիների ընթացքում փորձում էին մեզ հասկացնել անկախության գինը, բայց ճամփորդության հանդեպ սերը վեր գտնվեց ամեն ինչից: ՀՀԿ հնաբնակներից մեկի նման մեկնաբանությունը շատ ձեռնտու են իր հարազատ քաղաքական ուժին՝ արտագաղթում եք ոչ թե այն պատճառով, որ իշխանությունների վարած սոցիալ-տնտեսական, դեմոգրաֆիական քաղաքականությունը ոչ մի լավ բան չի խոստանում այստեղ մնալու դեպքում, այլ արտագաղթում եք, որովհետև դուք վատն եք՝ ուտող–ուրացող ազգ եք: Հետաքրքիր է նաև այն տրամաբանությունը, որով Գալուստ Գրիգորիչը գիտնականներին ու ինժեներներին դասում է նույն շարքին: Հարց է առաջանում՝ մեծահարուստ լինե՞լն է վատ բան, թե՞ գիտնական ու ինժեներ: Դե իհարկե, պետք է մնալ անգրագետ և գնահատել Գալուստ Սահակյանի կերտած անկախությունը, այն անկախությունը, որը ստիպել է 350 հազար գիտնականի, ինժեների, բանվորի, բժշկի, ուսուցչի, ապագա զինվորի՝ լքել սեփական հայրենիքը:

Ստելլա Խաչատրյան