Պատանի երկրապահների ճամբարը միջազգային ճանաչում է ձեռք բերում

Եռասերունդ Երկրապահի ուսումնամարզական ճամբարում անցկացվում է նետաձգության միջազգային մրցաշար՝ «Հայկյան նետեր»։ Մրցաշարի բացման ժամանակ ընթերցվեց ԵԿՄ վարչության նախագահ, Արցախի հերոս, Զորավար Մանվել Գրիգորյանի հետեւյալ ուղերձը։

Հարգելի՛ մարզիկներ, մարզիչներ, մրցավարներ, մարզասեր հանրություն, եռասերունդ Երկրապահ կամավորականների միության ներկայացուցիչներ.

Ջերմորեն շնորհավորում եմ եռասերունդ Երկրապահի ուսումնամարզական ճամբարում նետաձգության միջազգային մրցաշարի անցկացումը: Երկրապահը մշտապես կարեւորում է սպորտի, ֆիզկուլտուրայի նշանակությունը սերունդների դաստիարակման գործընթացում:

Մենք առաջնորդվում ենք «Առողջ մարմնում առողջ հոգի» ճշմարտությամբ: Երկրապահի ուսումնամարզական դասընթացներում ֆիզկուլտուրան եւ մարզական միջոցառումները առաջնային տեղ ունեն: Մենք այդ նպատակով գործակցում ենք տարբեր մարզական ֆեդերացիաների հետ՝ նետաձգություն, ձիասպորտ, թաեքվոնդո, շախմատ, ֆուտբոլ, դուքենդո, սամբո… ցանկը շատ երկար է եւ շարունակաբար համալրվող: Պատահական չէ նաեւ, որ ԵԿՄ շատ պատասխանատուներ նաեւ մարզական ֆեդերացիաներ են գլխավորում: Այսօր նետաձգության միջազգային մրցաշարի բացումն է, եւ հենց նետաձգության ֆեդերացիայի նախագահը ԵԿՄ վարչության նախագահության անդամ Նազիկ Ամիրյանն է:

Ինքս թաեքվոնդոյի ֆեդերացիայի պատվավոր նախագահն եմ, իսկ ֆեդերացիայի նախագահը ԵԿՄ վարչության նախագահության անդամ Կարեն Գրիգորյանն է: Տասնյակ մարզական ֆեդերացիաների նախագահներ ԵԿՄ վարչության անդամներ են, երկրապահներ:

Ողջունելի է եւ դաստիարակչական, շատ ուսանելի է, որ միջազգային այս մրցաշարն անցկացվում է պատանի երկրապահների ճամբարում: Սա մի կողմից նշանակում է, որ մեր պատանի, երիտասարդ երկրապահների համար ճամբարային այնպիսի իդեալական պայմաններ ենք ստեղծում, որ այստեղ նույնիսկ միջազգային նշանակության միջոցառումներ կարելի է կազմակերպել, այս նույն պայմաններում միջազգային ճանաչում ունեցող մարզիկներն էլ կարող ենք ապրել, մարզվել եւ լավ արդյունքներ ցուցաբերել:

Մյուս կողմից՝ նման խոշոր ստուգատեսի անցկացումը կնպաստի, որ մեր պատանի, երիտասարդ երկրապահներն առավել հետաքրքրվեն սպորտով, տվյալ մարզաձեւն ընտրած երկրապահների համար սա որակյալ մարզիկների հետ շփվելու փորձ եւ փորձառություն կնշանակի: Եռասերունդ Երկրապահ կամավորականների միության, Հանրապետության բոլոր երկրապահների, 5-րդ բրիգադի մարտիկների, պատանի, երիտասարդ երկրապահների եւ իմ անունից եւս անգամ շնորհավորում եմ «Հայկյան նետեր» միջազգային մրցաշարի մասնակիցներին, կազմակերպիչներին, մաղթում եմ բոլորիդ բարձր տրամադրություն, առողջ, ազնիվ մրցակցություն, եւ թող հաղթեն ուժեղագույնները:

ԵԿՄ ՎԱՐՉՈՒԹՅԱՆ ՆԱԽԱԳԱՀ,

ԱՐՑԱԽԻ ՀԵՐՈՍ,

ԶՈՐԱՎԱՐ        ՄԱՆՎԵԼ ԳՐԻԳՈՐՅԱՆ