ԵԼՔ-ի նահանջը...

Վերլուծական 16 Սեպտեմբեր, 2017 16:00

«Ելք» խմբակցության ղեկավար Նիկոլ Փաշինյանն անսպասելի մի ձևակերպում է հնչեցրել: Նա ասել է, որ ԵՏՄ-ից դուրս գալու նախաձեռնությունը միջոց է այդ թեմայով հանրության հետ երկխոսություն սկսելու և հանրային քննարկում ծավալելու համար: Այսինքն, դուրս գալն իբրև նպատակ գոյություն չունի, կա, ընդամենը, բանավեճ ծավալելու և այդ վիճաբանության կիզակետում լինելու ցանկություն:

«Ես կարծում եմ, որ մեզ մոտ արդեն ստացվել է այդ թեմայով երկխոսություն սկսել հանրության հետ, որովհետև բոլոր հեռուստաընկերությունները, թերթերը, կայքերը, որոնք ես բացում եմ, գրում են և խոսում են այդ թեմայով»,- ընդգծեց Փաշինյանը:

Նա հավելեց, որ իրենց նախաձեռնության վերաբերյալ արդեն արձագանքներ են գալիս նաև Ռուսաստանից և Եվրասիական տնտեսական միության մյուս երկրներից: «Գործընթացը մենք արդեն սկսել ենք, սկսվել է հանրային մեծ դիսկուրս: Ես կարծում եմ, որ հիմա մենք ունենք բոլոր լծակներ այդ դիսկուրսը շարունակելու համար»:

Ինչպես ասում է հայտնի երգը՝ ահա և վերջ: Միայն այն փաստը, որ «Ելք» դաշինքը այդպես էլ չներկացրեց ԵՏՄ-ից դուրս գալուց հետո Հայաստանի համար հնարավոր այլընտրանքային ուղիները, խոսում է այն իրողության մասին, որ անգամ դաշինքի անդամները քաջ գիտակցում էին, որ այս նախաձեռնությունն այդպես էլ միս ու արյուն չի ստանա, հետևաբար, կարիք էլ չկար երկար-բարակ գլուխ ջարդել և մտածել այլընտրանքային ելքեր:

Հասկանալով, որ նախաձեռնության տապալման արդյունքում «Ելք»-ը այս պարտիայի միակ պարտվողն է լինելու, հիմա էլ որոշել են իրենց ապահովագրեն և մանեվրելու հնարավորություն ստեղծեն: Երբ նախաձեռնությունը ԱԺ-ում շռնդալից կերպով կտապալվի՝ կհայտարարի, որ մինիմում ծրագիրը իրենք ի կատար են ածել, այն է՝ հանրային քննարկմանն են զարկ տվել և հարցը բերել են քաղաքական օրակարգ:

Այսպիսով Սերժ Սարգսյանը և ՀՀԿ-ն կկարողանան ապացուցել իրենց լոյալությունը Մոսկվային, իսկ «Ելք»-ը կփրկի իր քաղաքական դեմքը և իմիջը: Թե դրանից ի՞նչ կշահի Հայաստանը, որը շարունակելու է դեգերել ԵՏՄ կործանարար տիրույթում՝ դժվար չէ կռահել:

Սակայն, մինչ մեր քաղաքական ուժերը զբաղված են ժամավաճառությամբ՝ այլ սցենարի մասին պետք չէ անգամ մտածել…

Ստելլա Խաչատրյան