Նախագահականի արածը «ժուլիկությո՞ւն» էր, թե՞ պատահականություն

Հունիսի 4-ին տարածաշրջանային այցի շրջանակներում Հայաստան էր ժամանել ԱՄՆ պետքարտուղար Հիլարի Քլինթոնը: Այցից հետո հիմնականում խոսվում էր Քլինթոնի կողմից Սերժ Սարգսյանին ուղղված «հիանալի առաջնորդ» բառերի և խորհրդարանական ընտրությունների գնահատականի մասին։

Ըստ ՀՀ նախագահի պաշտոնական կայքում զետեղված հաղորդագրության՝ Քլինթոնը ԱԺ ընտրությունները գնահատել էր միջազգային չափանիշներին համապատասխանող։ Իսկ «պալատական» քաղաքագետները հեռուստատեսությամբ, ռադիոյով հայտարարում էին, որ մեծ ձեռքբերում և հաջողություն է եղել Քլինթոնի կողմից նման գնահատականների արժանանալը։

Սակայն, ինչպես պարզվեց «Հրապարակ»-ում լույս տեսած Լուսինե Պետրոսյանի «Ինչ պատահեց հետո, երբ խեղաթյուրեցին ԱՄՆ պետքարտուղարի խոսքը” հոդվածից, համաձայն Պետքարտուղարության կայքում տեղադրված պետքարտուղար Քլինթոնի և ԱԳ նախարար Էդվարդ Նալբանդյանի համատեղ ասուլիսի ամբողջական սղագրության Քլինթոնն ընտրությունների կապակցությամբ ասել էր. «Ինձ գոհունակություն պատճառեցին անցյալ ամիս կայացած Հայաստանի խորհրդարանական ընտրությունների վերաբերյալ միջազգային դիտորդների գնահատականները' թե ընտրությունները հիմնականում եղել են մրցակցային և ընդգրկուն, թեկնածուները մեծ մասամբ կարողացել են առանց խոչընդոտների քարոզարշավ մղել: Ընտրական գործընթացում արձանագրվել են նաեւ որոշ խնդիրներ, և մենք հուսով ենք, որ Հայաստանը կաշխատի ԵԱՀԿ-ի և այլոց հետ' հաջորդ ընտրություններն ավելի լավ անցկացնելու համար»:

«Հիանալի առաջնորդ»-ի կապակցությամբ ԱՄՆ պետքարտուղարության կայքում ոչինչ գրված չի եղել, քանի որ Քլինթոնի և Նախագահի հանդիպման մասին կայքում որևէ խոսք չի եղել։

ԱՄՆ դեսպանատնից այս մասին «Հրապարակ»–ին պատասխանել են. «Նախագահ Սարգսյանի հետ հանդիպմանը պետքարտուղարի խոսքը հպանցիկ էր և ոչ մամուլի համար: Այցելության ծրագրում հիմնական իրադարձությունը, որը լուսաբանում էին ԶԼՄ-ները, ԱԳ նախարար Նալբանդյանի հետ ասուլիսն էր: Այդ իրադարձության ամբողջական սղագրությունը տեղադրված է Պետքարտուղարության կայքում»։ ԱՄՆ դեսպանատնից Lurer.com-ի հետ զրույցում նշեցին, որ «պարզապես թարգմանությունների մեջ անճշտություն է եղել»։

Lurer.com–ը այս մասին զրուցեց քաղաքական գործիչների հետ։

ՀՀԿ խոսնակ Էդուարդ Շամազանովը նշեց, որ իր անհատական կարծիքը համընկնում է Սերժ Սարգսյանի մամլո քարտուղարի կարծիքի հետ։
Նշենք, որ Սարգսյանի մամուլի քարտուղար Արմեն Արզումանյանը պաշտոնապես արձագանքել էր «Հրապարակ”-ի հոդվածին Լուսինե Պետրոսյանին ուղղված նամակով, որը տպագրվել է (“Հրապարակ”, 23.06.2012):
Նամակում մասնավորապես ասված է. “Հարգելի Լուսինե, շնորհակալ եմ ՀՀ նախագահի ինտերնետային կայքում ԱՄՆ պետքարտուղար Հիլարի Քլինթոնի հետ հանդիպման վերաբերյալ մամուլի հաղորդագրության անգլերեն տարբերակում տեղ գտած վրիպակի վրա մեր ուշադրությունը հրավիրելու համար: Սխալն արդեն ուղղված է: Ինչ վերաբերում է Ձեր գնահատականներին, ընդ որում' նաև հաղորդագրության հայերեն տարբերակում իբր տեղ գտած խեղաթյուրումներին, դրանք ընդունելի չեն: Նախագահ Սերժ Սարգսյանի և պետքարտուղար Հիլարի Քլինթոնի ողջույնի խոսքերի հրապարակման կապակցությամբ հարկ եմ համարում տեղեկացնել, որ դրանք հնչել են մոտ երկու տասնյակ լրագրողների ներկայությամբ և, բնականաբար, հրապարակային էին, ինչպես բոլոր նմանատիպ այլ հանդիպումների դեպքում»։

ՀԱԿ ներկայացուցիչ, ԱԺ պատգամավոր Արամ Մանուկյանը Lurer.com–ի հետ զրույցում ասաց. «Ես ընդհանուր իմ մաշկի վրա, իմ աչքի առջև տեսել եմ այն մասսայական խախտումները, որոնք ակնհայտ են դարձել։ Տվյալ դեպքում որևէ մեկի կարծիքը կամ դիտողությունը, որը իմ տեսածից հեռու է, ինձ չի հետաքրքրում։ Ես մասնակից եմ եղել և՛ համամասնական, և՛ մեծամասնական ընտրություններում, ղեկավարել եմ Արաբկիրի շտաբը։ Արաբկիրը հանրապետության շատ թե քիչ հանգիստ, առանց բախումների, ցնցումների ընտրությունների դաշտն է։ Եվ եթե այս՝ ծայրից ծայր մասսայական կաշառքի, վարչականի ու մարդկանց ստիպելու, վարկաբեկելու, վախեցնելու վրա է ընտրություն անցկացվում, ի՞նչի մասին է խոսքը։ Կարող է կոպիտ հնչի, մեծամտություն չհամարեք, բայց որևէ այլ կարծիք ես չեմ ընդունում»։

Հոդվածագիր Լուսինե Պետրոսյանը, որ «Ժառանգություն» կուսակցության վարչության անդամ է, Lurer.com–ի հետ զրույցում ասաց, թե ՀՀ նախագահի ինտերնետային կայքում ԱՄՆ պետքարտուղարի խոսքը փոխեցին, «որովհետև Քլինթոնի խոսքը պետք է գրվեր այնպես, ինչպես արտասանվել է։ Չի կարող խոսքը չգրվել այնպես, ինչպես հնչել է անգլերեն լեզվում»։
«Նախագահականում ընդունեցին, որ սխալ են գործել: Իսկ թե ինչու են սխալը գործել, ինչ հաշվարկով, նախագահականում կարող են մեկնաբանել»,– ասաց նա։

«Ժառանգություն» կուսակցության վարչության անդամ, գլխավոր քարտուղար Ստյոպա Սաֆարյանը Lurer.com–ի հետ զրույցում նշեց, որ քաղաքականության մեջ «ժուլիկության» մի տեսակ կա, որը կապված է թարգմանչության մանիպուլյացիայի հետ. «Հաճախակի են Հայաստանում խեղաթյուրվել օտարերկյա դիվանագետների՝ այլ լեզվով արված հայտարարությունները՝ դրանք ուղղակի հայերեն թարգմանելով  այնպես, ինչպես ցանկալի է եղել տվյալ քաղաքական պահին։ Հիլարի Քլինթոնի հայտարարությունների աղավաղումը, որը հաստատեց նաև Հայաստանում ԱՄՆ դեսպանատունը և որը հետաքննության ենթարկեց պրոֆեսիոնալ լրագրողներից Լուսինե Պետրոսյանը, պետք է ասեմ՝ բացառությունների շարքից չէր: Այս կապակցությամբ նախագահական նստավայրը փորձում էր ցույց տալ, թե առաջիկա նախագահական ընտրությունների հետ կապված հարցերը լուծված են կամ լուծման ճանապարհին են: Ըստ տարածված հաղորդագրության՝ ԱՄՆ-ի նման պետության ղեկավարությունը, ի դեմ այդ քարտուղարի, ճանաչել է Սերժ Սարգսյանի առաջնորդությունը և պատրաստ է նրա հետ աշխատել ապագայում, մինչդեռ բնագրի տեքստից ակնհայտ է, որ խոսքն ընդամենը հայ-թուրքական արձանագրություններով Սերժ Սարգսյանի նախաձեռնողականության շարունակության մասին է և ոչ ավելին»: