«Դոն Պիպոյի» կալանքը ևս երկու ամսով երկարաձգվել է․ պաշտպանը որոշումն անօրինական է համարում

Առաջին ատյանի դատարանը ևս երկու ամսով երկարաձգել է «Դոն Պիպո» մականվամբ հայտնի Արթուր Ասատրյանի կալանքի տակ պահելու ժամկետը։

ԼՈւՐԵՐ․com-ի հետ զրույցում Արթուր Ասատրյանի փաստաբան Գեղամ Հակոբյանը հայտնեց, որ նրանք չեն ընդունում Առաջին ատյանի որոշումը և բողոքարկել են Վերաքննիչ դատարան։

Փաստաբանը նաև նշեց, որ բողոքարկել են, քանի որ ապօրինի կերպով է երկարացվել կալանքի տակ պահելու ժամկետը։

«Դատաքննության արդյուքները որևէ հիմք դատարանին չէին տալիս նման որոշում կայացնելու համար, քանի որ կալանավորման անհրաժեշտությունը որևէ կերպ չի հիմնավորվել և քննիչը որևէ փաստ կամ ապացույց չի ներկայացրել»,- ասաց Հակոբյանը։ 

Մեր հարցին՝ ինչպե՞ս է այս ամենին վերաբերվում Արթուր Ասատրյանը՝ փաստաբանը պատասխանեց․

«Բնականաբար լավ չի ընդունում։ Նրա նկատմամբ ակնհայտ անօրինականություններ են արդեն իրականացվում»։

Հիշեցնենք, որ Արթուր Սսատրյանին պատկանող առանձնատանը, կից շինություններում և այլ տարածքներում ԱԱԾ աշխատակիցների խուզարկության արդյունքում հայտնաբերվել է ապօրինի պահվող զենք և ռազմամթերք: 

Արթուր Ասատրյանին մեղադրանք է առաջադրվել ՀՀ քրեական օրենսգրքի 131-րդ հոդվածի 1-ին, 2-րդ, 3-րդ եւ 6-րդ կետերով («Մի խումբ անձանց կողմից նախնական համաձայնությամբ, առողջության համար վտանգավոր բռնություն գործադրելով, զենքի կամ որպես զենք օգտագործվող առարկաների գործադրմամբ, երեք անձի առեւանգումը») եւ 235-րդ հոդվածի 2-րդ մասով («Մի խումբ անձանց կողմից նախնական համաձայնությամբ հրազեն եւ ռազմամթերք ապօրինի կերպով ձեռք բերելը եւ պահելը») նախատեսված հանցագործություն կատարելու համար: