Փաշինյանն ապահովագրում է իրեն. գործընթացը սկսված է

Վերջին օրերին մամուլում համառորեն տեղեկություն է տարածվում, որ նոր իշխանությունները պատրաստվում են ռեստարտ կատարել նաև դիվանագիտական կորպուսում՝ հետ կանչելով մի շարք երկրներում Հայաստանի դիվանագիտական ներկայացուցիչներին: Խոսքը 15-20 դեսպանների մասին է, և այս պահին դժվար է ասել, թե ովքեր հրաժեշտ կտան իրենց զբաղեցրած պաշտոններին, սակայն գործընթացն արդեն իսկ սկսված կարելի է համարել՝ երեկ նախագահ Սարգսյանի հրամանագրով հետ է կանչվել Բելառուսում Հայաստանի Դեսպան Օլեգ Եսայանը: Գլխավոր ինտրիգը կայանում է նրանում՝ արդյո՞ք Եսայանի հետ կանչը կապված է հայ-բելառուսական հարաբերություններում առկա որոշակի լարվածությամբ, որը վերջին շրջանում էլ ավելի ակնհայտ է դարձել հատկապես ՀԱՊԿ շրջանակներում, թե այս հետ կանչը նախապես ծրագրած էր և Փաշինյանը հենց Բելառուսից է սկսում իրեն ապահովագրելու գործընթացը: Այո, հենց ապահովագրելու, որովհետև այսօր իրենց ծառայությունը շարունակող դեսպանների գերակշիռ մասը իր դիվանագիտական կարիերան սկսել է Սերժ Սարգսյանի դաբրոյով, հետևաբար Փաշինյանի համար Սարգսյանի բերած կադրերը լուրջ վտանգ են ներկայացնում՝ աչքի տակ ունենալով սաբոտաժի օդում կախված վտանգը:

Թեև այս տարիների ընթացքում Հայաստանի դիվանագիտական կորպուսի հասցեին հնչող քննադատության պակաս չի զգացվել և փոփոխությունները հասունացել են, այնուամենայնիվ, գլխավոր հարցը շարունակում է մնալ որակյալ կադրերի պակասը, ինչը կարելի է համարել նոր իշխանությունների աքիլլեսյան գարշապարը: Կհաջողվի՞ արդյոք Փաշինյանի դիվանագիտական հարթակում ապահովել ոչ միայն անունների, այլ նաև բովանդակային փոփոխություններ, առկա՞ են դրա համար անհրաժեշտ բանիմաց և փորձառու կադրերը, որոնք պետք է դառնան Փաշինյանի արտաքին քաղաքական վեկտորի նոր իրագործողները:

Այս հարցի պատասխանը դեռ չկա, մի բան ակնհայտ է՝ Փաշինյանը կադրային խնդիրներ ուներ անգամ կառավարության կազմը ընտրելիս: Մյուս կողմից դիվանագիտական կորպուսի փոփոխությունը ընդունված պրակտիկա է հեղափոխության միջով անցած գրեթե բոլոր երկրներում: Նոր իրողությունները ենթադրում են նոր մոտեցումներ ոչ միայն ներքին, այլ նաև արտաքին քաղաքականության մեջ: Հատկապես այսօր, երբ Հայաստանի հարաբերությունները արտաքին աշխարհի հետ այնքան էլ հարթ չեն ընթանում և առկա են անհասկացվածության որոշակի դրսևորումներ: Դիվանագիտական կորպուսում հնարավոր փոփոխությունները կարող են գործնականում լուծել ՝ Փաշինյանի համար այս անչափ կարևոր խնդիրը:

Ստելլա Խաչատրյան