10-ից ավելի կուսակցություն պետք է հասցնեն երեւանցիներին ներկայացնել իրենց ծրագրերը. «Հրապարակ»

«Հրապարակ» թերթը գրում է.

Երեկ ՀՀ կառավարությունն իր նիստում որոշում կայացրեց Երեւանի ավագանու լիազորությունները կրճատելու մասին։ Տարածքային կառավարման եւ զարգացման նախարար Սուրեն Պապիկյանն էլ հայտարարեց, որ ընտրության օրը հայտարարելու է Կենտրոնական ընտրական հանձնաժողովը, որի նիստը կայանալու է 30-40 օրվա ընթացքում։

Մենք պարզեցինք, որ օգոստոսի 18-ին Կենտրոնական ընտրական հանձնաժողովը նիստ է անելու եւ հայտարարելու է, որ սեպտեմբերի 23-ին կկայանան Երեւանի ընտրությունները։ Ըստ այդմ՝ կուսակցությունների առաջադրումը կընթանա մինչեւ օգոստոսի 29-ը։

Հիշեցնենք, որ Երեւանի ավագանու ընտրությունները կայանում են կուսակցական ցուցակներով։ Գրանցումը կտեւի մինչեւ սեպտեմբերի 3-ը։ Մասնակիցների գրանցումից մեկ շաբաթ անց՝ սեպտեմբերի 10-ին, նոր կսկսվի քարոզարշավը, որը կտեւի ընդամենը 11-12 օր, ինչը շատ քիչ է իրական քարոզչություն ծավալելու համար։

Հիշեցնենք, որ քվեարկության նախորդ օրը՝ սեպտեմբերի 22-ին, հայտարարվելու է լռության օր, եւ քարոզչությունն արգելվելու է։ Այս մարաթոնյան ընտրարշավի ընթացքում 10-ից ավելի կուսակցություն պետք է հասցնեն երեւանցիներին ներկայացնել իրենց ծրագրերը, ավագանու անդամների թեկնածուներին եւ ամենակարեւորը՝ քաղաքապետի իրենց թեկնածուին։