«Ժառանգության» քաղաքապետի 3 թեկնածուներից մեկը Րաֆֆի Հովհաննիսյանն է

Քաղաքական 20 Օգոստոս, 2018 12:52

Այսօր տեղի է ունենալու «Ժառանգություն» կուսակցության վարչություն լիագումար նիստը, որի ընթացքում որոշվելու է, թե Երևանի ավագանու ընտրություններում ով է զբաղեցնելու իրենց ցուցակի առաջին հորիզոնականը: Այս մասին լրագրողների հետ հանդիպմանն ասաց «Ժառանգություն» կուսակցության առաջնորդ Րաֆֆի Հովհաննիսյանը:

«Մենք անցյալ շաբաթ արդեն հայտարարել ենք, որ մասնակցում ենք ընտրություններին, մինչև այսօր ժամանակ տվեցինք և հույս տածեցինք, որ միասնական ցուցակի մեր առաջարկը կարող էր իրականություն դառնալ, բայց, ավաղ, շատ հարգելի պատճառով, բայց մեր կարծիքով՝ սխալ մոտեցմամբ հեղափոխության միասնական ցուցակը գոնե այս ընտրություններում պետք է վերածվի բազմակուսակցական տարբեր ցուցակների: Չի բացառվում, որ մինչ խորհրդարանական ընտրությունները մենք կկարողանանք ավելի լայն, հեռահար մոտեցում ցուցաբերել»,- ասաց նա:

Րաֆիի Հովհաննիսյանը նշեց, որ «Ժառանգության» քաղաքապետի թեկնածուները կլինեն ներկուսակցական և քաղաքացիական հասարկության ներկայացուցիչներ։ Կուսակցությունը քննարկում է՝ Հովհաննիսյանի, Արմեն Մարտիրոսյանի և վարչությունից դուրս գտնվող անձի թեկնածությունը, սակայն վերջինիս անունը Հովհաննիսյանը դեռ չբարձրաձայնեց:

Անդրադառնալով նոր կառավարության 100 օրվա ամփոփմանը Հովհաննիսյանը նկատեց, որ ՀՀ վարչապետ Նիկոլ Փաշինյանի կառավարման առաջին 100 օրերը եղել են զգացմունքային, մի փոքր ցուցադրական։

«Փոխանակ վարչապետի հեռահար տեսապատկերը ներկայացնելու, ավելի շատ պատասխանում էր այս կամ այն քննադատությանը կամ ռեպլիկներին, որոնք ստացվել էին քաղաքական եւ քաղաքացիական տարբեր հոսանքներից»,-ասաց Հովհաննիսյանը