Սոված փորին Հայրենիք սիրելը բարդ գործ է

Վերլուծական 21 Օգոստոս, 2018 20:00

Սփյուռքի նախարարությունը պատրաստվում է առաջարկներ ներկայացնել ԱԳՆ և վարչապետին, որպեսզի մեծ համայնքներ ունեցող դիվանագիտական հաստատություններում Սփյուռքի նախարարության ներկայացուցիչներ լինեն, որոնք համայնքի հետ ամենժամյա կապի մեջ կլինեն։ Այս մասին այսօր լրագրողների հետ հանդիպմանն ասաց ՀՀ սփյուռքի նախարար Մխիթար Հայրապետյանը։ Այնուամենայնիվ, առաջարկը նաև խնդրահարույց ու հակասական է: Այն ավելի շատ հարցեր է առաջ բերում, քան պատասխաններ: Նման մի առաջարկ էլ Հայրապետյանն արել էր ամիսներ առաջ, երբ առաջ էր քաշել երկպալատ խորհրդարանի ստեղծման գաղափարը, որոնցից մեկում կլինեն միայն սփյուռքահայեր: Այստեղ նույնպես հասկանալի չէր, թե ինչպես և ովքեր էին ընտրելու սփյուռքի ներկայացուցիչներին Հայաստանի խորհրդարանի՝ իրենց համար նախատեսված պալատում, կամ արդյո՞ք Սփյուռքի կազմակերպություններն ունեն ներուժ ներհամայնքային ընտրություն կազմակերպելու համար: Նաև հասկանալի չէր, թե ով պիտի վարձատրի սփյուռքահայ խորհրդարանականներին՝ իրենց կատարած աշխատանքի համար:

Հայրապետյանի վերջին առաջարկը նույնպես «օդում արվածների» շարքից է: Նախ՝ այս նախաձեռնությունը նոր ֆինանսական բեռ է դառնալու պետության ուսերին, բայց արդյո՞ք Փաշինյանի կառավարությունն այսօր ի վիճակի է նման ճոխությունների դիմել, այն պարագայում երբ հաշվված է յուրաքանչյուր լուման: Կամ մեկ այլ հարց՝ ի՞նչ տրամաբանությամբ է արվում այս առաջարկը, չէ՞ որ խոշոր համայնքներում տարիների ընթացքում, այսպես թե այնպես, մշակվել և գործում են Հայաստանի հետ համագործակցության խողովակներ և այստեղ նոր մարմնի, ներկայացուցչի առկայության կարիք, կարծես թե, չի զգացվում: Ավելի տրամաբանական կլիներ նման ներկայացուցչություններ հիմնել փոքր համայնքներում, որտեղ ցանկության դեպքում հնարավոր կլիներ նպաստել հայապահպանությանը և ձևավորվել պետության հետ երկխոսության պրակտիկան, որն այս տարիների ընթացքում բացակայել է, քանի որ, չմեղանչելով արդարության դեմ՝ պետք է նշել՝ Սփյուռքի նախարարությունն այս տարիների ընթացքում աչքաթող է արել անգամ խոշոր համայնքների խնդիրները և հոգսերը: Իսկ այսօր արդեն, Հայրապետյանի կառույցը կարծես թե ցանկանում է հեշտ ճանապարհով՝ տրորված արահետով գնալ, ինչը վկայում է ընդամենը բուռն աշխատանքի իմիտացիա ստեղծելու մասին: Տոտալ հայրենադարձության մասին նախարարի գեղեցիկ հայտարարությունները և առաջարկները նույնպես դեռևս որոշակի հակասությունների մեջ են բարձր մակարդակի արտագաղթի հետ, և փաստ է, որ մեր հայրենակիցները դեռևս լուրջ վերապահումներ ունեն հայրենիք վերադառնալու մասով և տեսանելի չեն նախարարի նշած շատ մեծ հեռանկարները՝ այդ գործընթացը կազմակերպելու համար: