100 օր. «Պարտադիրից» պարտադրված հրաժարականից մինչև կոռուպցիոն բացահայտումներ
Վերլուծական
Սոցապ նախարար Մանե Թանդիլյանը այսօր ամփոփել է իր աշխատանքի 100 օրը: Այս օրերի ընթացքում իհարկե ամենաառարկայական և նույնիսկ սկանդալային որոշումը կապված էր «Կուտակային կենսաթոշակների մասին» ՀՀ օրենքի փոփոխության հետ: Ինչպես գիտենք համակարգն ավելի գրավիչ և ընդունելի դարձնելու նպատակով Թանդիլյանը նախաձեռնել էր Օրենքում փոփոխություններ անելու մասին նախագծի մշակում։ Հասարակության ուշադրությունից չէր վրիպել այն, որ Թանդիլյանը ժամանակին «Դեմ եմ պարտադիրին» նախաձեռնության ակտիվիստներից էր, ակտիվորեն պայքարում էր պարտադիր կուտակայինի չեղարկման համար, կարելի է ասել, որ նա հայտնի է դարձել հենց այդ պայքարից: Հանրության մեջ տարածվող այն կարծիքը, որ նա որպես նախարար մի կողմ է դրել իր համոզմունքները եւ այժմ պնդում է հակառակը ստիպեցին Թանդիլյանին հրաժարականի դիմում ներկայացնել, որը թեև Փաշինյանի կաբինետի առաջին հրաժարականն էր, սակայն մի շարք օբյեկտիվ պատճառներով մերժվեց վարչապետի կողմից: Այնուամենայնիվ փաստը մնում է փաստ՝ այս տարվա հուլիսի 1-ից 1976 թվականից հետո ծնված բոլոր ՀՀ քաղաքացիների համար կուտակային կենսաթոշակը կդառնա պարտադիր: Միևնույն ժամանակ նախարարը վստահեցնում է, որ այս հարցի շուրջ քննարկումը շարունակվելու է: Այսինքն մարդիկ պիտի քննարկեն մի բան, ինչն արդեն օրենքի ուժ է ստացել: Ուրեմն ինչո՞ւ են քննարկելու: Կամ գուցե պետք էր դեպքերի հաջորդականությո՞ւնը փոխել` նախ քննարկել, հետո հաստատել, ինչպես անում են բոլոր խելամիտ մարդիկ և բոլոր խելամիտ իշխանությունները…
Թանդիլյանը իր մյուս կարևոր ձեռքբերումն է համարում ակտիվ համագործակցությունը իրավապահ մարմինների հետ` քաղաքացիների կողմից ներկայացված բողոքների վերահասցեագրում համապատասխան իրավապահ մարմիններ՝ ուսումնասիրություններ անելու և ըստ այդմ անհրաժեշտ քայլեր ձեռնարկելու նպատակով։Սակայն գլխավոր հարցը շարունակում է մնալ այն, թե ինչու է շարունակում ցածր մնալ սոցապ ոլորտում կոռուպցիոն բացահայտումների մակարդակը, այն պարագայում, երբ տարիներ շարունակ ոլորտը համարվել է գրեթե ամենակոռումպացվածը: Հայաստանի տարբեր քաղաքների քաղաքապետարանների սոցիալական աջակցության բաժինների աշխատակիցների կողմից ապօրինությունների բացահայտման մասին լուրերը ինչ խոսք ոգևորիչ են, սակայն տպավորություն է ստեղծվում, որ նախարարությունը և իրավապահ մարմինները նախկինում ձևավորված ավանդույթի համաձայն աշխատում են միայն մանր ձկներին հայտնաբերելու ուղղությամբ, իսկ խոշորները ինչպես միշտ խուսափում են պատասխանատվությունից…
ՈՒՂԻՂ ԵԹԵՐ
Ամենադիտված 
Մահացել է երգիչ Հովհաննես Գրիգորյանը
