Նոր օրենք՝ փոքր ՀԷԿ-երի համար

Այսօր` օգոստոսի 23-ին, կառավարության նիստի ընթացքում, քննարկվեց «Հայաստանի Հանրապետության ջրային օրենսգրքում լրացում և փոփոխություններ կատարելու մասին» օրենքի նախագիծը։

Բնապահպանության նախարար Էրիկ Գրիգորյանը նշեց, որ օրենքի նախագծով՝ նոր կառուցվող փոքր հիդրոէլեկտրակայանների համար որոշ չափորոշիչներ են սահմանվում, և Ջրային օրենսգրքով կարգավորվում են այն դեպքերը, որի պարագայում մերժման հիմք է հանդիսանում փոքր հիդրոէլեկտարակայանի կառուցումը։

«Առաջինը՝ գետերի ցանկն է կարգավորվելու, թե որտեղ է արգելվելու հիդրոլէկտրակայան կառուցել։ Դրանց մեջ մտնում են Կարմիր գրքում գրանցված և տարածքին բնորոշ ձկնատեսակների ձվադրավայրեր ունեցող գետերը և այն գետերը, որտեղ կան դիտակետեր։ Եվ սահմանափակում են գետահատվածները, որտեղ բնության  հատուկ պահպանվող տարածքների գոտիներ, բնության հուշարձաններից 180 մետր շառավղով տարածքներ, ջրային համակարգի պահպանման գոտիներ են»,-ասաց Գրիգորյանը և հավելեց, որ նաև կարգավորվելու է ՀԷԿ-երի կառուցման համար անտառահատումները. կա՛մ արգելվելու է, կա՛մ լիազոր մարմնի կողմից  թույլտվություն է լինելու։

Վարչապետ Նիկոլ Փաշինյանը հարցրեց՝ օրենքի ընդունումից հետո արդյոք մնո՞ւմ են գետեր որոնց վրա հնարավոր է ՀԷԿ-եր կառուցել։ Դրան ի պատասխան՝ Գրիգորյանը նշեց ՝ «Այո՛, մնում են։  Ըստ էության, ՀԷԿ-երի կառուցումը գերազանցել է այն ծավալը, որը պետք է կառուցվեր ՀՀ-ում: Սակայն այս կարգավորումը չի վերաբերում արգելմանը, հակառակը՝ փոքր ՀԷԿ-երը, որոնք ի սկզբանե նպատակ ունեին լինել էկոլոգիապես ավելի ընդունելի՝ լինեն այդպիսին։ Այն կարգավորումները, որ կային մինչ այժմ, բերել է մի իրավիճակի, որ փոքր ՀԷԿ-երի կառուցումը էկոլոգիական խնդիրներ է առաջացրել»։