Պլեխանովի անվան Ռուսաստանի տնտեսագիտական համալսարանի երևանյան մասնաճյուղն իր դռները բացեց առաջին կուրսեցիների առջև (լուսանկարներ)

Գ.Վ. Պլեխանովի անվան Ռուսաստանի տնտեսագիտական համալսարանի երևանյան մասնաճյուղն այսօր՝ սեպտեմբերի 3-ին, իր հյուրընկալ դռները բացեց առաջին կուրսեցիների առջև: Նոր ուսումնական տարվա մեկնարկի կապակցությամբ կազմակերպված հանդիսությանը ողջույնի խոսքերով հանդես եկան ԲՈւՀ-ի հոգաբարձուների խորհրդի նախագահ Արման Վարդանյանը, տնօրեն Թամարա Վարդանյանը, Երևանում Ռուսաստանի գիտության և մշակույթի կենտրոնի տնօրեն Սերգեյ Ալեքսեևիչ Ռիբինսկին և այլք: 

Հոգաբարձուների խորհրդի նախագահ Արման Վարդանյանը նախ շնորհավորեց առաջին կուրսեցիներին ԲՈՒՀ ընդունվելու կապակցությամբ, նշեց, որ այն իրենց կյանքի կարևորագույն քայլերից մեկն է և հույս հայտնեց, որ ուսումնառության տարիները կլինեն միայն վերելքի տարիներ, խորհուրդ տվեց երազել ու ձգտել դեպի բարձունքներ, չընկճվել դժվարությունների առջև ու անմոռաց կերպով նետվել մասնագիտական վայրիվերումների հորձանուտ։

Ելույթով հանդես եկավ նաև Գ.Վ.Պլեխանովի անվան Ռուսաստանի տնտեսագիտական համալսարանի երևանյան մասնաճյուղի տնօրեն Թամարա Վարդանյանը: Վերջինս, ողջունելով ուսանողներին, նշեց, որ իր ղեկավարած ԲՈՒՀ-ն ունի երկար տարիների պատմություն, հիմնադրվել է 1907 թվականին և հանդիսանում է առաջին տնտեսագիտական համալսարանը Ռուսաստանում։ Այն ունի 22 մասնաճյուղ, որոնց շարքում երևանյան մասնաճյուղը զբաղեցնում է առաջատար դիրքեր և առանձնանում հմուտ կադրերի ու տաղանդաշատ ուսանողների առատությամբ։ Տնօրենը հավաստիացրեց, որ թե՜ համալսարանը, և թե՜ ներսում գործող քոլեջը վերջին շրջանում շեշտակի առաջընթաց են ապրել զարգացման և մասնագիտական կադրերի ամրապնդման գործում, որ այդ միտումը հաստատուն կերպով կշարունակվի նաև ապագայում։ 

ՀՀ-ում ՌԴ դեսպանատան և Երևանում Ռուսաստանի գիտության և մշակույթի կենտրոնի անունից հանդես եկավ Ս. Ա. Ռիբինսկին` շնորհավորելով առաջին կուրսեցիներին, մաղթեց նրանց նորանոր հաջողություններ ուսման մեջ, նաև հավելեց, որ պատրաստ է բազմակողմանիորեն աջակցել կրթօջախի ուսանողներին տարբեր ծրագրերի շրջանակներում։   

Ողջույնի խոսքով ու երաժշտական կատարումներում հանդես եկան համալսարանի ուսանողները: Այնուհետև տեղի ունեցավ առաջին կուրսեցիների երդման արարողությունը:

Նշենք, որ դեռևս անցած տարի այս համալսարան էր այցելել ԽՍՀՄ ժողովրդական արտիստ Իոսիֆ Կոբզոնը, որին շնորհվեց Ռուսաստանի Գ. Վ. Պլեխանովի անվան տնտեսագիտական համալսարանի երևանյան մասնաճյուղի հոգաբարձուների խորհրդի պատվավոր անդամի կոչում և նրա անվամբ համալսարանում բացվեց լսարան:

Ցավոք սրտի, օրեր առաջ մեծանուն երգիչը հեռացավ կյանքից։ Այսօրվա միջոցառմանը Իոսիֆ Դավիդովիչի վառ հիշատակին նվիրվեց մի գեղեցիկ կատարում՝ ԲՈՒՀ-ի տաղանդաշատ ուսանողի կողմից: Հանրահայտ "Есть только миг" երգը ներկաների մոտ արթնացրեց խոր հույզեր, հիշողություններ ու մտքեր անցյալի, ներկայի ու ապագայի մեկ տիեզերական հատման կետում ու այդ պահի հավերժացման մասին: