ՌԴ ԱԴԾ-ն հայտնում է 2014թ.-ից «Իսլամական պետության» եկամուտների 10 անգամ նվազման մասին

«Իսլամական պետություն» ահաբեկչական կազմակերպության եկամուտները 2014թ.-ից նվազել են 10 անգամ: Այս հանգամանքն ահաբեկիչներին ստիպում է անցնել աշխատանքի ավելի էժան եղանակների: Այս մասին հայտնում է ՏԱՍՍ-ը` վկայակոչելով ՌԴ անվտանգության դաշնային ծառայության օպերատիվ տեղեկատվության և միջազգային կապերի ծառայության ղեկավար Սերգեյ Բեսեդայի` ՌԴ ԱԳՆ-ի կազմակերպած «Միջազգային ահաբեկչության դեմ պայքարի համատեքստում հակազդեցություն զինամթերքի անօրինական փոխադրմանը» միջազգային համաժողովում ունեցած ելույթը:

«Եթե համեմատենք «Իսլամական պետության» ֆինանսականեկամուտները, որոնք եղել են 2014թ.-ին և գնահատվել շուրջ 3 մլրդ դոլար, ապա ներկա պահին «Իսլամական պետության» գրոհայիններին հաջողվում է ստանալ տարեկանմոտավորապես 200-300 մլն դոլար, այսինքն` 90%-ով պակաս»,- ասել է Բեսեդան:

Նրա կարծիքով` դա տեղի ունեցել նախևառաջ այն պատճառով, որ զգալիորեն նվազել են նավթից ստացված եկամուտները, ինչպես նաև հարկահանությունից ստացված եկամուտները, որոնք գրոհայինները գանձում էին իրենց հսկողության տակ եղած տարածքներից:

Բեսեդան նշել է, որ մարդկային ռեսուրսների, տեխնիկայի և ֆինանսական կորուստներն ստիպել են Մերձավոր Արևելքում «Իսլամական պետության» ենթակայության տակ գործող ահաբեկչական կազմակերպություններին անցնել ավելի էժան աշխատանքային եղանակների:

«Այսօր ահաբեկչական կազմակերպություններն անցնում են ավելի քիչ ֆինանս պահանջող ծրագրերի: Մասնավորապես, ակտիվացել է սոցիալական ցանցերում աշխատանքը, ուժեղացել է հենց սոցիալական ցանցերում քարոզչությունը: Գրոհայինների ներգրավումը նույնպես սոցիալական ցանցերի միջոցով է արվում»,- նշել է Բեսեդան: