«Սփյուռք» ամառային դպրոցի լրագրողների ճանաչողական այցելությունները

Այս շաբաթվա ընթացքում «Սփյուռք» ամառային դպրոցի շրջանակներում վերապատրաստվող լրագրողներն առաջին դասախոսություններից հետո եղան ԵՊՀ պատմության թանգարանում: Այստեղ նրանք տեղեկացան, որ Երևանում համալսարան հիմնելու վերաբերյալ որոշումն ընդունվել է դեռևս 1919 թվականի մայիսի 16-ին Հայաստանի Հանրապետության նախարարների խորհրդի կողմից, իսկ 1920 թվականի հունվարի 31-ին Ալեքսանդրապոլի (այժմ' Գյումրի) առևտրային դպրոցի շենքում մեծ շուքով կատարվել է Հայաստանի համալսարանի բացման հանդիսավոր արարողությունը։

Լրագրողները մեծ հետաքրքրությամբ ունկնդրեցին ինչպես ԵՊՀ հիմնադրման պատմությունը, այնպես էլ 1920 թվականի փետրվարի մեկին համալսարանում դասերի մեկնարկը տված նշանավոր հայագետ Ստեփան Մալխասյանցի և այլ երևելիների կենսագրականները։

Մասնակիցները տեղեկացան, որ ուսումնական առաջին տարում համալսարանն ուներ մեկ' պատմալեզվաբանական ֆակուլտետ, 262 ուսանող և 32 դասախոս։ Համալսարանի առաջին ռեկտոր Յուրի Ղամբարյանի ջանքերով հիմնադրման առաջին իսկ տարում համալսարանում դասախոսելու են հրավիրվել արտասահմանյան բուհեր ավարտած, մանկավարժական ու գիտական աշխատանքի փորձ ունեցող այնպիսի անվանի մասնագետներ, ինչպիսիք էին Հակոբ Մանանդյանը, Մանուկ Աբեղյանը և ուրիշներ։

«Սփյուռք» ամառային դպրոցի լրագրողներն այցելեցին նաև Երևանի պատմության թանգարան: Այստեղ նրանք սիրով ծանոթացան ոչ միայն Երևան քաղաքի, այլև հենց թանգարանի պատմությանը: Թանգարանը 2005թ. հաստատվել է Երևանի քաղաքապետարանի նորակառույց շենքում և Երևանի քաղաքապետարանի հետ ձևավորում է միասնական ճարտարապետական համալիր:

Մասնակիցներին շատ տպավորեց այն փաստը, որ թանգարանում պահվում են ավելի քան 89700 առարկաներ, որոնք ներկայացնում են մայրաքաղաքի նյութական և հոգևոր մշակույթը։

Լրագրողները ծանոթացան թանգարանում պահվող հնագիտական, ազգագրական, դրամագիտական, կերպարվեստի, գրավոր աղբյուրների, լուսանկարների և այլ հավաքածուներին, որոնք պատմում են մայրաքաղաքի անցյալի ու ներկայի մասին։

«Սփյուռք» ամառային դպրոցի լրագրողները եղան նաև Երևանի Մեսրոպ Մաշտոցի անվան Մատենադարանում' հին ձեռագրերի և փաստաթղթերի պահպանման և ուսումնասիրման կենտրոնում, որն ունի ձեռագրերի և միջնադարյան գրքերի աշխարհի ամենախոշոր հավաքածուներից մեկը:
Մասնակիցներին պատմեցին, որ հայերեն ձեռագիր մատյանների ամենախոշոր պահոցը Երևանի Մեսրոպ Մաշտոցի անվան մատենադարանն է (հին ձեռագրերի գիտահետազոտական ինստիտուտ-թանգարան): Այն ստեղծվել է 1921 թվականին՝ Էջմիածնի մատենադարանի հիմքի վրա, և առաջին գիտահետազոտական հաստատությունն է Հայաստանում:

Հնադարյա ծաղկողների և գրիչների ստեղծագործությունները դիտելիս դժվար չէր նկատել յուրաքանչյուրի ներքին հպարտությունը հզոր արմատների համար: