«Անգրագետ ձևով վիրաբուժական միջամտությունը տանելու է մահվան»․ սահմանադրագետ

Բարձրագույն դատական խորհրդի նախագահ Գագիկ Հարությունյանի հրաժարականը նրա անձնական որոշումն է և ոչ ոք չգիտի՝ ինչ նրբություններ կան դրա հիմքում։ Այս մասին ԼՈՒՐԵՐ․com-ի հետ զրույցում ասաց սահմանադրագետ Վարդան Այվազյանը։

Նրա խոսքով՝ մեկ անձի հրաժարականով դատական համակարգը չի տուժի, այլ բան է, եթե համակարգի դատավորները զանգվածային կերպով հրաժարականներ ներկայացնեն․ «Մեր դատավորների գիտելիքներով, համապատասխան չափանիշներով կադրեր չեն կարող գտնել, որ միանգամից լրացնեն թափուր տեղերը։ Էլ չասեմ, որ մեր սովորական դատավորները միջինը 4-5 անգամ ավելի ծանրաբեռնվածություն ունեն, քան նորման է, հետևաբար, եթե հրաժարականները զանգվածային բնույթ կրեն՝ կհանգեցնեն դատական համակարգի կոլապսի։ Այս ամենը չի կարող լինել առանց քաղաքական ենթատեքստի և ամենևին պարտադիր չէ դրա տակ բացասական դրսևորում տեսնել։ Եթե իշխանություններն ուզում են այդ համակարգը բուժել, արդյոք դա քաղաքական ենթատեքստ չունի՞, իհա՛րկե ունի։ Վարչապետը հայտարարեց, որ դատական համակարգը վիրաբուժական միջամտության կարիք ունի, միանշանակ ընդունում եմ այս տեսակետը, բայց դրա արդյունքում կամ հիվանդն ապաքինվում է, կամ մահանում, եթե անգրագետ կերպով դա եղավ, ուրեմն դատական համակարգը կմահանա, եթե մասնագիտական լուրջ հանրույթի ներգրավմամբ եղավ՝ կառողջանա»,-ասաց նա։ 

Անդրադառնալով բարեփոխումների գործընթացին՝ սահմանադրագետը նկատեց, որ ցանկացած բարեփոխում պետք է ունենա կոնցեպտ՝ մանրակրկիտ հիմնավորումներով ու հաշվարկներով և արվի օրենսդրական կարգավորման շրջանակում։ Ըստ նրա՝ գործընթացը որքան էլ նպատակ ունենա կարգի բերել համակարգը, բայց դուրս լինի օրենսդրական կարգավորումներից՝ որպես վիրաբուժական միջամտություն՝ հիվանդին տանելու է դեպի մահվան, ոչ թե հակառակը։

Խոսելով ԲԴԽ նոր նախագահի ընտրության ընթացակարգի մասին, սահմանադրագետը նշեց, որ Գագիկ Հարությունյանը հրաժարվել է ոչ միայն ԲԴԽ նախագահի պաշտոնից, այլև ԲԴԽ անդամ լինելուց․ «10 անդամներից 5-ը դատավորներ են, որոնք դատավորների ընդհանուր ժողովի կողմից են ընտրվում, մյուս 5-ը՝ իրավաբան-գիտնականներ են, որոնք ընտրվում են ԱԺ-ի կողմից՝ 3/5-ով։ Քանի որ Հարությունյանը իրավաբան-գիտնական էր, նրան փոխարինող կընտրի ԱԺ-ն, իսկ ԲԴԽ նախագահ ընտրում է Բարձրագույն դատական խորհուրդը»,-ասաց Այվազյանը։

Նկատենք, որ Գագիկ Հարությունյանի հրաժարականը հետևեց 2-րդ նախագահ Ռոբերտ Քոչարյանի դատական վճռին։ Ենթադրվում է, որ սա ճնշման փորձ է նաև Սահմանադրական դատարանի վրա, որպեսզի դրա նախագահ Հրայր Թովմասյանը ևս հրաժարական տա, Ռոբերտ Քոչարյանի գործը վերադառնա Վերաքննիչ և այս ձևով հնարավոր լինի հասնել Քոչարյանի ազատազրկմանը։

Հարցին՝ նման միտում տեսնո՞ւմ եք, ինչի՞ կհանգեցի նման սցենարը, սահմանադրագետը պատասխանեց․ «ՍԴ-ի որոշումներն ընդունվում են կոլեգիալ կարգով։ ՍԴ անդամները ՍԴ նախագահից կախվածություն չունեցող սուբյեկտներ են և որոշում ընդունելիս իրենք են քվեարկում, և ձայների մեծամասնությամբ էլ որոշումն ընդունվում է։ Իսկ ՍԴ նախագահի մեկ ձայնով որոշումների վրա ազդեցություն չի կարող լինել։ Եթե գտնում են՝ ինքը չպետք է լինի, ապա նրա փոխարեն ուրիշը կլինի, դրանով ոչինչ չի փոխվելու, դրական կամ բացասական հետևանք չի ունենալու»,- նշեց Վարդան Այվազյանը։ 

Սոնա Հարությունյան