Լևոն Յոլյանը Սահմանադրության պահանջների խախտմամբ է զբաղեցնում Հաշվեքննիչ պալատի նախագահի պաշտոնը

Հաշվեքննիչ պալատի իրավաբանական վարչության պետ Արամ Մամիկոնյանը բացի Լևոն Յոլյանի կողմից Հաշվեքննիչ պալատի նախագահի պաշտոնը Սահմանադրության խախտմամբ զբաղեցնելու գրություններից հրապարակել է նաև Լևոն Յոլյանի և Վերահսկիչ պալատի խորհրդի անդամների նշանակման իրավական ակտերի օրինակները:

Նա ուշադրություն է հրավիրել այն բանի վրա, որ Լևոն Յոլյանի նշանակման ակտում, ի տարբերություն Վերահսկիչ պալատի խորհրդի անդամների նշանակման ակտերի, նշված չէ պաշտոնավարման ժամկետ, որը ևս մեկ ապացույց է, որ Վերահսկիչ պալատի Հաշվեքննիչ պալատ դառնալուց հետո պետք է տեղի ունենար Հաշվեքննիչ պալատի նախագահի ընտրություն և, հետևաբար, ԱԺ որոշման մեջ միտումնավոր չի նախատեսվել Լևոն Յոլյանի պաշտոնավարման ժամկետը, որպեսզի իրավական առումով ապահովվի Հաշվեքննիչ պալատի նախագահի ընտրության անխափան իրականացումը։ 

«Կրկին հավելեմ, որ գոյություն չունի որևէ իրավական ակտ, որով նախատեսված է Վերահսկիչ պալատի նախագահի՝ որպես Հաշվեքննիչ պալատի նախագահ պաշտոնավարումը շարունակելու գործընթաց»,- իր ֆեյսբուքյան էջում գրել է Արամ Մամիկոնյանը:

Նշենք, որ մինչ այս Մամիկոնյանը հայտարարել էր, որ Լևոն Յոլյանը Սահմանադրության պահանջների խախտմամբ է զբաղեցնում Հաշվեքննիչ պալատի նախագահի պաշտոնը: Ըստ նրա, մասնավորապես, Լևոն Յոլյանը 2017 թվականի փետրվարի 28-ին ՀՀ ԱԺ Ո-222-Ա որոշմամբ նշանակվել է Վերահսկիչ պալատի նախագահ:

«Սահմանադրությունում փոփոխություններ կատարելուց և «Հաշվեքննիչ պալատի մասին» ՀՀ օրենքն ուժի մեջ մտնելուց հետո 2018 թվականի ապրիլի 9-ին Վերահսկիչ պալատը դարձել է Հաշվեքննիչ պալատ: Սահմանադրության փոփոխությունների 220-րդ հոդվածը սահմանում է, որ Վերահսկիչ պալատի անդամները շարունակում են պաշտոնավարել որպես Հաշվեքննիչ պալատի անդամներ: «Նորմատիվ իրավական ակտերի մասին» ՀՀ օրենքի 41-րդ հոդվածի 1-ին մասի համաձայն՝ նորմատիվ իրավական ակտի նորմը մեկնաբանվում է` ելնելով դրանում պարունակվող բառերի և արտահայտությունների տառացի նշանակությունից: Իսկ Լևոն Յոլյանը, ի տարբերություն Հաշվեքննիչ պալատի ներկայիս որոշ անդամների, անհատական իրավական ակտով նշանակված է եղել ոչ թե որպես Վերահսկիչ պալատի կամ վերջինիս խորհրդի անդամ, այլ՝ որպես Վերահսկիչ պալատի նախագահ: Ակնհայտ է, որ վերոհիշյալ իրավակարգավորումները որևէ կերպ վերաբերելի չեն Վերահսկիչ պալատի նախագահ ընտրված պաշտոնատարի կողմից նորաստեղծ մարմին հանդիսացող Հաշվեքննիչ պալատի նախագահի պաշտոնում գործունեությունը շարունակելուն: Իսկ եթե, այնուամենայնիվ, փորձենք խնդրո առարկայի նկատմամբ կիրառել «Վերահսկիչ պալատի մասին» ՀՀ օրենքի 10-րդ հոդվածի 1-ին մասի դրույթները և դրանց ուժով Վերահսկիչ պալատի նախագահին համարել խորհրդի անդամ, ապա ստացվում է, որ ՀՀ Սահմանադրության 220-րդ հոդվածի իմպերատիվ պահանջներով Լևոն Յոլյանը պետք է Հաշվեքննիչ պալատում շարունակեր պաշտոնավարել ոչ թե որպես նախագահ, այլ՝ որպես պալատի անդամ»,- գրել է նա՝ հարց բարձրացնելով, թե նշված իրավակարգավորումների ներքո ինչու է հենց Լևոն Յոլյանը շարունակում պաշտոնավարել որպես Հաշվեքննիչ պալատի նախագահ, այլ ոչ թե Վերահսկիչ պալատի խորհրդի անդամներից Սահմանադրության նույն 220-րդ հոդվածի ուժով Հաշվեքննիչ պալատի անդամ դարձած մեկ այլ անձ։

Մամիկոնյանը նաև հավելել է, որ գոյություն չունի որևէ իրավական ակտ, որով նախատեսված է Վերահսկիչ պալատի նախագահի որպես Հաշվեքննիչ պալատի նախագահ պաշտոնավարումը շարունակելու գործընթաց․ «Վերահսկիչ պալատի Հաշվեքննիչ պալատ դառնալուց հետո Ազգային ժողովում, իրավական առումով, պետք է տեղի ունենար Հաշվեքննիչ պալատի նախագահի ընտրություն՝ «Հաշվեքննիչ պալատի մասին» ՀՀ օրենքի մասնավորապես 17-րդ հոդվածի և «Ազգային ժողովի կանոնակարգ» ՀՀ սահմանադրական օրենքի իմպերատիվ պահանջներին համապատասխան: Ուստի, խնդրում եմ Ձեզ հանձնարարել նշվածի առնչությամբ կատարել համապատասխան ուսումնասիրություն և միջոցներ ձեռնարկել Հայաստանի Հանրապետության Հաշվեքննիչ պալատում փաստացի առկա սահմանադրաիրավական ճգնաժամը վերացնելու ուղղությամբ»,- հայտնում է Հաշվեքննիչ պալատի իրավաբանական վարչության պետը: