Բյուջեն «քերողը»

Քաղաքացիներին կոչ եմ անում բյուջեն և պետությունը չդիտարկեն այլևս «քերելու» օբյեկտ, այլ վերաբերվեն հոգատարությամբ: Այս մասին այսօր՝ մայիսի 5-ին, ԱԺ-ում իր ելութի ժամանակ հայտարարեց «Իմ քայլը» խմբակցության պատգամավոր Արմեն Փամբուխչյանը: ԼՈՒՐԵՐ.com-ը փորձեց պարզել, թե որքան «հոգատարությամբ» է վերաբերվել պետական բյուջեին Փամբուխչյանն իր պատգամավորական գործունեության ողջ ընթացքում՝ հաշվի առնելով տարիներ շարունակ ստացած պարգևավճարներն ու կրկնակի պարգևավճարները: Հարկ է հասկացնել հարգելի պատգամավորին, որ նշված երևույթը գումար «քերելու» պակաս օրինակ չէ, ուստի տեղին է հիշեցնել, որ քաղաքացիները ոչ թե բյուջե են «քերում», այլ բյուջե են լցնում, որոնցից ինքն ու մյուս պատգամավորները գումարներ են ստանում այդ քաղաքացիների աշխատավարձի եռապատիկի չափով։ 

Նկատենք, որ ԱԺ պատգամավորների աշխատավարձի չափը կազմում է 661 հազար 400 դրամ, սակայն, լինելով ԱԺ Տարածաշրջանային և եվրասիական ինտեգրման հարցերի մշտական հանձնաժողովի նախագահի տեղակալ, Փամբուխչյանը ստանում է 694 հազար 470 դրամ աշխատավարձ, դրան գումարած աշխատավարձի 30%-ի չափով պարգևավճարը, որը կազմում է մոտավորապես 200 հազար դրամ: Այսպիսով, Փամբուխչյանի ամսական եկամուտը կազմում է մոտ 1 մլն դրամ: Եթե սրան գումարենք դեկտեմբեր ամսվա ընթացքում 4 անգամ ստացած պարգևավճարները, ապա իշխանական պատգամավորի մեկ ամսվա եկամուտը կհատի 4 մլն դրամի սահմանը: Հիշեցնենք, որ ԱԺ պաշտոնական կայքում հրապարակված կարգադրությունների համաձայն՝ դեկտեմբեր ամսին պատգամավորները պարգևատրվել էին աշխատավարձի 100%-ի չափով՝ 2 անգամ, 30%-ի և 20%-ի չափով՝ մեկական անգամ:  Դրանից մեկ ամիս առաջ էլ հայտնի էր դարձել, որ 2019 թ. միայն առաջին 10 ամիսներին ԱԺ-ն 14 անգամ պարգևատրել էր պատգամավորներին ու աշխատակիցներին, որի ընդհանուր գումարը կազմել էր մոտ 2 մլն դոլար: Հունվարին և փետրվարին կատարած աշխատանքների համար պագևատրումների ընդհանուր չափը կազմել էր 235 միլիոն դրամի կամ 495 հազար ԱՄՆ դոլարի չափով: Մասնավորապես, հունվար ամսին 17 օր աշխատելու համար պարգևավճարների թիվը կազմել էր 173.777.983 ՀՀ դրամ, որը համարժեք է շուրջ 362.000 դոլարին, իսկ փետրվար ամսվա պարգևավճարները՝ 61․149․110 ՀՀ դրամ, որը համարժեք է շուրջ 125.000 ԱՄՆ դոլարին:

Նշենք, որ ԱԺ նախագահ Արարատ Միրզոյանը հայտարարությամբ է հանդես եկել, որի համաձայն՝ երկրում կորոնավիրուսի դեմ տարվող պայքարի շրջանակերում ԱԺ պատգամավորները պատրաստակամություն են հայտնել մարտ ամսի դեռևս չստացած պարգևավճարները հատկացնել կորոնավիրուսի դեմ պայքարին։ Արդարության համար չենք կարող չնշել նաև մի առիթով Փամբուխչյանի արած հայտարարությունը. «Անհրաժեշտ է այնքան սահմանափակել պարգևավճարների բյուջեն, որ այլևս հանրության շրջանում դժգոհություններ չլինեն: Պետք է լինի որոշակի արդարության սկզբունք, այսինքն՝ համեմատած մնացած բոլորի ստացած աշխատավարձի հետ, միլիոնները, որ ստանում են, բնականաբար, մարդկանց նյարդերը գրգռում է, և իրենք այդտեղ անարդարություն են տեսնում», - նշել էր իմքայլականը, ասել է թե՝ հոգատարություն դրսևորելով։ 

Այնուամենայնիվ, նկատի ունենալով վերոգրյալը՝ Արմեն Փամբուխչյանին խորհուրդ կտայինք բյուջեի և պետության նկատմամբ հոգատար գտնվելու դասեր տալ նաև ինքն իրեն և կոչեր հնչեցնելու փոխարեն՝ պարզապես գործել: