Ի՞նչ ունեցվածք ունեն նախկին իշխանություններին դատող դատավորները

Ձեր ուշադրությանն ենք ներկայացնում վերջին ամիսներին առավել ռեզոնանսային դատական գործերում ներգրավված՝ նախկիններին դատող դատավորների ունեցվածքը, որը վերջիններս հայտարարագրել են՝ ներկայացնելով բարձրաստիճան պաշտոնատար անձանց էթիկայի հանձնաժողով: Մարտի 1-ի գործի անջատված մասը, որում ներգրավված է նաև ՀՀ երկրորդ նախագահ Ռոբերտ Քոչարյանը, քննելու է դատավոր Վարդան Գրիգորյանը։ Ըստ բարձաստիճան պաշտոնատար անձանց էթիկայի հանձնաժողովի կայքում հրապարակված հայտարարագրերի՝ Վարդան Գրիգորյանը համեստ եկամուտներով և գույքով ապրող դատավորներից է։ Նրա վերջին հայտարարագրի համաձայն, որը ներկայացրել է 2018-ին՝ Երևանի դատարանում պաշտոնը ստաձնելիս, Գրիգորյանն ունի երկու բնակարան, Nissan Teana մակնիշի մեքենա, 2,1 մլն դրամ ու 660 դոլար։ Գրիգորյանի մյուս հայտարարագրերում ամենախոշոր գործարքը 37 000 դոլար վարկն է և 57 000 դոլարով բնակարանի գնումը։ Նախկինում նա խոշոր նվիրատվություններ կամ փոխառություններ, բացի վերոնշյալ վարկից, չի ստացել։  Այսօր Մարտի 1-ի գործը քննում է դատավոր Աննա Դանիբեկյանը: 2017 թվականին նրա փոխառությունները կազմել են 17մլն, 10մլն և 4մլն դրամ։ Դրամական միջոցները 3մլն-ից նվազել են 2մլն, սակայն աճել են եկամուտները՝ 9,885,776.00 դրամ, որից 6,135,824.00 դրամն աշխատանքից ստացված վարձատրությունն է, իսկ մնացածը՝ փոխառությունները։ 2018-ին դատավորը բնակարաններից մեկը 10,833.00 դոլարով վաճառել է։ Նրա փոխառությունները նույնն են մնացել, դրամական միջոցները կազմել են՝ 1.5մլն դրամ, 1000 դոլար և 3000 եվրո, իսկ եկամուտները՝ 10,120,058.00 դրամ, որը գոյացել է աշխատավարձից և փոխառություններից։ Քրեական գործը, որով անցնում է երրորդ նախագահ Սերժ Սարգսյանը, քննելու է դատավոր Վահե Միսակյանը: Վերջինս 2018 թվականին հայտարարագրել է 3,900,000.00 ՀՀ դրամ արժողությամբ MAZDA 6 2.5 L ավտոմեքենան, 3,500,000.00 ՀՀ դրամ, 5,000.00 ԱՄՆ դոլար: Դատավորի եկամուտները հարկային տարում կազմել են 18,987,976.00 ՀՀ դրամ: Վերաքննիչ քրեական դատարանը՝ նախագահությամբ դատավոր Սերգեյ Մարաբյանի, որը վերջերս մերժեց ՊեԿ նախկին նախագահ, ֆինանսների նախկին նախարար Գագիկ Խաչատրյանի կալանքի ժամկետը երկարացնելու որոշման դեմ նրա պաշտպանի բողոքը, հայտարարագրել է 2,400,000.00 ՀՀ դրամ, 2,500.00 ԱՄՆ դոլար և 150,000.00 ռուբլի: Հարկային տարում նրա եկամուտները կազմել են 9,648,732.50 ՀՀ դրամ, միևնույն ժամանակ, ուշագրավ է, որ դատավորը որպես նվիրատվություն հայտարարագրել է նաև 200,000.00 ռուբլի: