«Հայոց եկեղեցու պատմությունը» «խորթ զավակի» կարգավիճակում է հայտնվել․ Շիրակի թեմի առաջնորդ

Աշխարհը կշարունակի իր ընթացքը, արևը դարձյալ կծագի ու մայր կմտնի, բլուրները դաշտերից բարձր կլինեն, գետերը երկու ափ կունենան, բայց Հայաստանը չի ունենա քրիստոնյա հասարակություն և քրիստոնյա գիտելքներ ունեցող սերունդ։ Այսպես է կարծում Հայ Առաքելական եկեղեցու Շիրակի թեմի առաջնորդ գերաշնորհ Տեր Միքայել արքեպիսկոպոս Աջապահյանը։

Տեր Միքայելը վստահ է, որ «Հայոց եկեղեցու պատմություն» առարկան մեծ դերակատարում ունի երեխաների դաստիարակության մեջ․ «Եթե առարկան հանվի՝ կունենանք անգրագետ սերունդ, քրիստոնեական արժեքներից պարպված, Հայ եկեղեցու ժառանգությանը անհաղորդ»։ 

Միքայել արքեպիսկոպոս Աջապահյանի խոսքով՝ մարդիկ կհպարտանան, որ առաջին քրիստոնյա ազգն են, բայց, երբ քրիստոնեությունից հարց տան, խայտառակ կլինեն։

«Հայ եկեղեցու ժառանգությունը այնքան մեծ է, տարողունակ, որ  նույնիսկ մեկ առարկայով այդ ամբողջ գիտելիքն ու ժառանգությունը փոխանցելը հնարավոր չէ և շատ քիչ է նույնիսկ շաբաթական մեկ դասաժամով՝ 5-րդ դասարանից մինչև 12-րդ դասարան, էլ ուր մնաց, որ այդ ամենը տարալուծեն։ Դա պարզապես խաբեություն է: Եթե ոմանք կարծում են և համոզված են, որ դա հնարավոր է, նշանակում է՝ ինքնախաբեության մեջ են»,- փաստում է արքեպիսկոպոսը։

Շիրակի թեմի առաջնորդը վստահ է, որ եկեղեցու ծեսը, քրիստոնեական դավանությունը, չեն կարող ինտեգրել պատմությանը․ «Առանց այն էլ «Հայ ժողովրդի պատմությունն» էլ լավ չի ուսուցանվում, եթե «Հայոց եկեղեցու պատմությունն» էլ միացնեն, շիլաշփոթ կդառնա․ ի՞նչ կա դրա մեջ որ»։

ԼՈՒՐԵՐ․com-ի այն հարցին, թե ԿԳՄՍՆ-ի հետ եղե՞լ են բանակցություններ, Տեր Միքայելը պատասխանեց․ «Ոչ  մի բանակցություն առ այսօր չի եղել, ես ընդամենը զրույց եմ ունեցել ԿԳՄՍ փոխնախարարի հետ, որտեղ ասել եմ, որ կազմեք հանձնախումբ, որ այս հարցերը քննարկենք։ Եկեղեցին պատրաստ է իր օժանդակությունը ցուցաբերել, ոչ թե  թելադրողի կարգավիճակում լինել»,- ապա հավելեց․ «Ասել են՝ կձևավորենք, կներկայացնենք կառավարությանը, կհաստատվի, կաշխատենք»։

«Սպասում ենք հանձնախմբի  կազմմանը, որպեսզի մենք մեր հարցերը դնենք, իրենք՝ իրենցը, և տեսնենք՝ ինչ ենք անում։ Դրանից հետո հնարավոր է՝  խռովված  կամ հաշտ բաժանվենք»,- նշեց արքեպիսկոպոս Աջապահյանը։

Միքայել արքեպիսկոպոս Աջապահյանը ընդգծում է, որ բազմաթիվ հարցեր կան քննարկելու․ ««Հայոց եկեղեցու պատմության»  օպտիմալացման հարցը կա, այն ավելի լավը դարձնելու, ուսուցիչների վերապատրաստման,  «Հայոց եկեղեցու պատմության» նկատմամբ նորմալ վերաբերմունք ունենալու»։

«Մինչև հիմա ԿԳՄՍՆ-ի համար «Հայոց եկեղեցու պատմությունը» «խորթ զավակի» կարգավիճակում է եղել․ մենք չենք ուզում, որ այդպես լինի»,- եզրափակեց Հայ Առաքելական եկեղեցու Շիրակի թեմի առաջնորդ Տեր Միքայել արքեպիսկոպոս Աջապահյանը։

Արփինե Հակոբյան