Պատվաստանյութերն ավելի անվտանգ են, քան սննդային թունավորումները. Արսեն Թորոսյան

Մենք կարող ենք վարվել այնպես, ինչպես ուզում ենք՝ սահմանված կանոնների շրջանակներում, բայց պետք է գիտակցենք նաեւ այդ վարքագծի ռիսկայնության աստիճանը: Այս մասին, այսօր՝ հուլիսի 7-ին, լրագրողների հետ հանդիպման ժամանակ նշեց ՀՀ առողջապահության նախարար Արսեն Թորոսյանը՝ անդրադառնալով այն հարցին,  որ առողջապահության նախարարը կոչ էր արել չայցելել ռեստորաններ, սրճարաններ, մինչդեռ շատ պատգամավորներ այցելում են, իսկ վարչապետն էլ նախարարի դիրքորոշմանը հակասող հայտարարություն էր արել՝ նշելով, որ միակ պահանջը դիմակ կրելն է եւ սոցիալական հեռավորություն պահպանելը:

«Այո, կյանքը շարունակվում է Հայաստանում, ինչպես ամբողջ աշխարհում, բայց նույնիսկ սահմանված կանոններն իրենց մեջ ինչ-որ ռիսկ են պարունակում: Հանրային սնունդն իր մեջ ավելի մեծ ռիսկ է պարունակում, քան այլ տեսակները, որովհետեւ հանրային սննդի, ընդհանրապես սնվելու պրոցեսում դու գործողություններ ես իրականացնում, որի ժամանակ մեծ քանակի վիրուսային մասնիկներ ես արտաբերում շրջակա միջավայր եւ դա կարող է տարբեր մարդկանց վարակման պատճառ դառնալ: Դրա համար ես որպես մեծ ռիսկայնություն ունեցող վարքագիծ նշել էի նաեւ դա: Ուրիշ ռիսկային բաներ էլ կարող եմ նշել, օրինակ երգեցողությունը ամենառիսկային  գործողության տեսակներից մեկն է, որովհետեւ մեծ քանակի վիրուսային մասնիկներ ես արտաշնչում  շրջակա միջավայր»,-ասաց նախարարը:

Անդրադառնալով այն հարցին, թե հնարավոր է, որ պատվաստանյութերն անվտանգ չլինեն, ասաց Առողջապահության նախարար Արսեն Թորոսյանը․ «Պատվաստանյութերը գնահատվում են երեք չափորոշիչով՝ նախ, ինչքանով են նրանք առաջացնում հակամարմիններ ինչ դոզայով ներարկելու դեպքում, երկրորդ՝ արդյոք դա առաջացնում է մարդու վրա այլ հետևանքներ, երրորդ, թե ինչքանով են նրանք իջեցնում վարակվածության տոկոսը։ Ուզում եմ ասել, որ պատվաստանյութերը մարդկության պատմության մեջ հայտնաբերված երբևէ ամենաանվտանգ բժշկական միջամտություններն են, ավելի անվտանգ, քան ասենք սննդային թունավորումները, որոնք ավելի շատ մարդ են սպանում, քան վակցինաները, որոնք ընդհանրապես մարդ չեն սպանում, եթե ճիշտ են օգտագործվում։ Որոշ շրջանակների անմեղսունակ կասկածներին նույնիսկ չեմ ուզում անդրադառնալ, նրանց անմեղսունակությունը ժամանակն է ապացուցել: Նրանք դրա վրա շարունակում են կառուցել իրենց մարտավարությունը, փորձելով մարդկանց հույզերի վրա խաղալով մեծ հակապատվաստումային արշավ առաջացնել, ինչը անխուսափելիորեն ռիսկ է պարունակում մեր քաղաքացիների կյանքի ու առողջության համար: Մենք պետք է մեր ճշգրիտ, կրթական ինֆորմացիայով ճնշենք այդ արշավը»։