Թավշյա պաշտոնյաների ստերի թոփ 10-յակը

Հայաստանի իշխանությունները, այսպես կոչված՝ թավշյա պաշտոնյաները, պարբերաբար հայտնվում են, մեղմ ասած, անհարմար դրության մեջ, քանի որ բացահայտվում է վերջիններիս կողմից ասված սուտը: Նրանք հայտարարություններ են անում, պնդումներ, փորձում են արդարանալ, սակայն ինչպես ասում են՝ իրավիճակ է փոխվել, հասարակությունը և մամուլը շատ արագ հաջողացնում էին բացահայտել ստերը և վեր հանել դրանք:

Ներկայացնենք ձեզ թավշյա պաշտոնյաների ստերի թոփ 10-յակը: 

1) Ազգային ժողովի միջանցքում մայիսի 13-ին վիճաբանություն տեղի ունեցավ ԱԺ փոխխոսնակ Ալեն Սիմոնյանի և «Լուսավոր Հայաստան» խմբակցության ղեկավար Էդմոն Մարուքյանի միջև։ Միջադեպից հետո Ալեն Սիմոնյանը, վերահաստատելով օրեր առաջ իր հնչեցրած միտքը, թե Էդմոն Մարուքյանը համագործակցում է նախորդ իշխանությունների հետ, որպես հիմնավորում` հայտարարեց, թե Մարուքյանը կողմ է քվեարկել նախկին կառավարության բոլոր ծրագրերին։ Հեղափոխությունից հետո՝ 2018 թ․ հունիսի 7-ին, Նիկոլ Փաշինյանի նոր ձևավորված կառավարության ներկայացրած ծրագրին Մարուքյանը կողմ է քվեարկել և միայն վերջին՝ կառավարության 2019 թ․ ծրագրին է, որ «Լուսավոր Հայաստան» խմբակցությունը, Էդմոն Մարուքյանի գլխավորությամբ, դեմ է քվեարկել։ Այսպիսով, կարող ենք փաստել, որ Ալեն Սիմոնյանի այն հայտարարությունը, թե Էդմոն Մարուքյանը նախորդ կառավարությունների ծրագրերին կողմ է քվեարկել, չի համապատասխանում իրականությանը 

2) Հայկական բնապահպանական ճակատ կամավորական նախաձեռնությունը հերքման պահանջ էր ուղարկել ՀՀ շրջակա միջավայրի արդեն նախկին նախարար Էրիկ Գրիգորյանին` մեղադրելով վերջինիս սուտ խոսելու մեջ: Նախարարն ԱԺ ամբիոնից ելույթ ունենալիս բառացի ասել էր, որ «... այդ տեքստը, որ Դուք այսօր կարդացիք, որը նաեւ երեկ էիք ներկայացնում, այդ տեքստը գրողները 4 տարի առաջ էլի էդ ձեւ տեքստ էին գրում, որ  նայեք, ՀԷԿ-երը եւ այլն, եւ այլն, հետո ստացան 70.000 դոլար դրամաշնորհ եւ հետո առաջարկեցին, որ ՀԷԿ-երի կառուցման համար բանկերը ինչ-որ մոտեցումներ ցուցաբերեն»: 

3) Հայկ Մարությանը, ըստ մամուլում տեղ գտած հրապարակումների, ստում էր` պնդելով, որ 29 մլն-ի պարգեւավճար Է բաժանվել քաղաքապետարանի աշխատակիցներին: Փաստացի, խոսքը գնում էր առնվազն 100 մլն դրամի մասին: 

4) Առողջապահության նախարար Թորոսյանը ստել է, ապա խոստովանել` դիմակներ չկրելու կոչը պայմանավորված է եղել դիմակների դեֆիցիտով, այլ ոչ թե դրանց անօգտակարությամբ: 

5) Վերջին ժամանակներս սահմանադրական իրավունքի «փորձագետ» դարձած և Սահմանադրական դատարանի մասով «մասնագիտացած» Վահագն Հովակիմյանը ֆեյսբուքյան գրառում էր կատարել, որում գրել էր. «Փաստորեն Կիմ Բալայանը և Գագիկ Հարությունյանը դեռևս ՍԴ անդամ են, բայց գաղտնի էին պահում»։ Սակայն, Վահագն Հովակիմյանի «բացահայտումը» հերքեց Ազգային ժողովի աշխատակազմի ղեկավարի նախկին տեղակալ, «Հայրենիք» կուսակցության խորհրդի անդամ Արսեն Բաբայանը: Վերջինս ներկայացրել է փաստաթղթեր, համաձայն որոնց` դեռևս 2018 թվականին ՍԴ աշխատակարգային համապատասխան որոշումներով դադարել են Գագիկ Հարությունյանի, Կիմ Բալայանի և Վոլոդյա Հովհաննիսյանի լիազորությունները: 

6) Ազգային ժողովում մայիսի 8-ին տեղի ունեցած ծեծկռտուքին որոշ պատգամավորներ միջամտեցին կողմերին բաժանելու, որոշներն էլ մի քանի հարված հասցնելու համար։ Սակայն, տեսանյութում հստակ երևում է նաև, թե ինչպես է Ղալումյանը թիկունքից մոտենում Մարուքյանին ու հարվածում, հստակ լսվում է նաև հարվածի ձայնը, ու երևում են Մարուքյանի՝ ձեռքով գլուխը պաշտպանելու կադրերը։ Ըստ այդմ՝ Ղալումյանի պնդումը, թե ինքը քաշում էր Էդմոն Մարուքյանին, որպեսզի վերջինս չհարվածի Սասուն Միքայելյանին, չի համապատասխանում իրականությանը, քանի որ Մարուքյանը չէր կարող հարվածել Միքայելյանին, իսկ Ղալումյանը թիկունքից հարվածել է Էդմոն Մարուքյանին։ 

7) Համացանցում տարածվել էր տեղեկատվություն, որի համաձայն՝ Արագածոտնի մարզպետ Դավիթ Գևորգյանը չորս տարի առաջ ընկերների հետ մասնակցել է ՌԴ դեսպանատան դիմաց կազմակերպված բողոքի ակցիաներին: Բողոքի ակցիայի ժամանակ մասնակիցները փորձել են այրել ՌԴ դրոշը, իսկ երբ ոստիկանները փորձել են դա կանխել, Դավիթ Գևորգյանը դրոշը գցել է ոտքերի տակ և կոշիկները սրբել է վրան: Այս տեղեկությունը Դավիթ Գևորգյանը հերքել էր՝ ասելով, որ այն իրականությանը չի համապատասխանում, և նա ՌԴ-ի նկատմամբ այդպիսի դիրքորոշում չունի և չի ունեցել: Սակայն, Դավիթ Գևորգյանը ստում է, քանի որ վերոգրյալ տեղեկատվության հետ տարածվել է նաև տեսանյութ, որտեղ պարզ երևում են Գևորգյանը և վերջինիս գործողությունները: 

8) Արարատի մարզպետ Գարիկ Սարգսյանը հայտարարել էր, թե փոխմարզպետ Արտավազդ Նազարեթյանը իր բաջանաղը չէ, իրականում` Սարգսյանի կինը և Նազարեթյանի կինը մորաքրոջ աղջիկներ են: Մարզպետը ստել էր նաև մորաքրոջ հարսի մասով. Լիլիթ Միրզախանյանը մարզպետարանի աշխատակազմի գլխավոր քարտուղարի պաշտոնակատարն է: 

9) Վարչապետ Նիկոլ Փաշինյանն անցնող տարվա ընթացքում մի քանի սուտ հայտարարություններով է հանդես եկել։ Օրինակ, 1000 դրամների հիմնադրամի մուտքերի աճի մասին խոսելով՝ վարչապետը նշել էր, որ 2018 թ. առաջին կեսում փոխանցված գումարների համեմատ այս տարի մուտքերն ավելացել են մոտ 350 մլն դրամով։ Իրականում տարվա մուտքերն աճել էին ընդամենը 17 մլն դրամով։ Փաշինյանը նոյեմբերի 27-ին ֆեյսբուքյան գրառմամբ հայտնել էր, որ Հայաստանը 2019 թվականին Legatum Prosperity Index-ի բարգավաճման ինդեքսում զբաղեցրել է 61-րդ տեղը՝ նախորդ տարվա համեմատ բարելավելով իր դիրքը 27 կետով: Այս հայտարարությանն արձագանքեց Արմեն Աշոտյանը և հայտնեց, որ Փաշինյանի հայտարարությունը սուտ է. Հայաստանն իր դիրքերը բարելավել է ոչ թե 27, այլ 7 կետով; Վարչապետը «100 փաստ Նոր Հայաստանի մասին-2.-ը» ներկայացնելիս մի քանի անհիմն և կեղծ հայտարարություններ էր արել։ Նրա խոսքով՝ Արարատյան դաշտում իրականացվել են 13 խորքային հորերի փականային ռեժիմի բերման աշխատանքներ, ինչի արդյունքում խնայվել է շուրջ 880 լ/վրկ ջրաքանակ, սակայն Ջրային կոմիտեից հայտնեցին, որ այս տարի ոչ մի խորքային հոր փականային ռեժիմի չի բերվել։ Պարզվեց, որ Սևանա լճի ջրի խնայողությունը եղել է ոչ թե 104 մլն խորանարդ մետր, այլ դրա կեսը։ 

10) ՊԵԿ արդեն նախկին նախագահ Դավիթ Անանյանը, ըստ էության, ստում էր՝ հայտարարելով, թե հեղափոխությանը նախորդած տարում ՊԵԿ-ում ևս բարձր պարգևավճար են ստացել։ Մասնավորապես, Ռաֆիկ Մաշադյանի՝ բարձրաստիճան պաշտոնատար անձանց էթիկայի հանձնաժողով ներկայացրած հայտարարագրից պարզ է դառնում, որ ամբողջ 2017-ին Մաշադյանը ստացել է 10 միլիոն 97 հազար 440 դրամ, որը գոյացել է աշխատանքի վարձատրությունից և/կամ դրան հավասարեցված այլ վճարումներից։ Իսկ 2018-ի միայն դեկտեմբեր ամսին Մաշադյանը ստացել է 9.6 միլիոն դրամ։ ԶԼՄ-ի տեղեկություններով՝ Անանյանը ստում է նաև, երբ հայտարարում է, թե պարգևավճարներ ստացել են ՊԵԿ նախագահից մինչև վերջին տեսուչն ու հավաքարարը։ ՊԵԿ շարքային աշխատողները լրատվամիջոցների ներկայացուցիչներին պատմում էին, որ պարգևավճարներ ստացել են բացառապես ղեկավար կազմն ու նրանց մտերիմները։