Դիլետանտությո՞ւն, թե՞ մտածված քաղաքականություն. ինչո՞ւ է պասիվ հայտնի ՊՈԱԿ-ը

Ադրբեջանի կողմից Հայաստանի սահմանին արդեն երրորդ օրը տևացող սադրիչ գործողությունների ֆոնին տարակուսելիորեն պասիվ են պետական այն օղակները, որոնք իրենց կանոնադրությամբ և գործի բնույթով պարտավոր էին առաջինը մղվել տեղեկատվական պատերազմի առաջնագիծ՝ հաշվի առնելով այն իրողությունը, որ ռազմական հաջողություններից ոչ պակաս կարևոր է թշնամուն տեղեկատվական դաշտում պարտության մատնելը: 
Հայաստանում Ադրբեջանական հակաքարոզչությանը պարտավոր էր լծվել «Կառավարության տեղեկատվական-վերլուծական կենտրոն» ՊՈԱԿ-ը, որը մեր երկրում առավել հայտնի է որպես ֆեյքերի ՊՈԱԿ, քանի որ բազմիցս է գրվել այս ՊՈԱԿ-ի համար օր ու գիշեր տքնաջան աշխատող ֆեյքերի գործունեության մասին, որոնց թիրախը սակայն, չգիտես ինչու, ոչ թե հակառակորդն էր, այլ՝ քաղաքական ընդդիմախոսը: 

Նշենք, որ «Կառավարության տեղեկատվական-վերլուծական կենտրոն» ՊՈԱԿ-ի ղեկավար Հովհաննես Մովսիսյանը իր բուն գործունեությանը անցավ ընդամենը երեկ՝ հայտարարելով, որ տեղեկատվական պատերազմում հակազդելու նպատակով ստեղծվելու է հատուկ խումբ, իսկ տարածվող ապատեղեկատվությունը հերքվելու է հատուկ հարթակում: Հարթակում, սակայն, հերքվել է ընդամենը երեք տեղեկություն, այն էլ փաստենք, որ ապատեղեկատվության փաստը հաստատել էր մամուլը, իսկ ՊՈԱԿ-ը ընդամենը տեղադրել էր այն փաստերի ստուգման հարթակում, չնայած, ըստ տրամաբանության, պետք է լիներ հակառակը: Հարյուրավոր ֆեյքերը, որոնք այդքան ջանասիրաբար լծված են քաղաքական ընդդիմախոսներին հայհոյելու սուրբ գործին, անգամ նեղություն չեն քաշել լայնորեն տարածեն իրենց ՊՈԱԿ-ի հերքումները: Ի՞նչ է սա՝ մասնագիտական դիլետանտությո՞ւն, թե՞ նպատակային քաղաքականություն, որը, կարծես թե, ուրվագծվում է այս օրերին նաև ավելի բարձր մակարդակում և միտված է ադրբեջանական կողմի հանդեպ որոշակի լոյալություն պահպանելուն:

Հիշենք հենց վարչապետի տարակուսելի հարցը կառավարության նիստին, թե արդյոք չէին կարող հայտնի ՈՒԱԶ-ի ուղևորները մոլորված լինել: Ակնհայտ է, որ կա որոշակի հրահանգ վերևներից ՝ լոյալ վերաբերվել կիրթ հարևանի սադրիչ գործողություններին: 

Ի տարբերություն վերոնշյալ ՊՈԱԿ-ի և ի պատիվ հայոց բանակի՝ նշենք, որ Հայաստանի զինված ուժերը՝ շարքային զինվորից մինչև 3-րդ բանակային կորպուսի հրամանատար և պաշտպանության նախարար, փայլուն են կատարում իրենց առաջադրանքը և արդյունքում հակառակորդը յուրաքանչյուր սադրանքից հետո հետ է շպրտվում՝ կրելով նյութական և մարդկային զգալի վնաս: Միևնույն ժամանակ նշենք, որ վերոնշյալ պասիվները, որքան պասիվ էին հակառակորդի քարոզչությանը հակազդելու հարցում, նույնքան էլ պասիվ էին հայոց բանակի և գեներալների հաջողությունների վրա ուրախանալու և այդ հաջողությունների փաստը գովելու հարցում: Տպավորություն է, որ 3-րդ բանակային կորպուստի հրամանատար գեներալ-գնդապետ Գրիգորի Խաչատուրովի հմուտ գործողությունները սահմանին ուրախություն են պատճառել միայն նախկին իշխանության ներկայացուցիչներին, իսկ նոր՝ թավշյա իշխանության ներկայացուցիչները արձագանքել են զուսպ, առանց ավելորդ էնտուզիազմի և ոգևորության, մի տեսակ չուզելով, ինչը, համաձայնեք, մեղմ ասած տարօրինակ է և առաջացնում է բազում հարցեր… 

Հայկական բանակը մեր զինվորների, սպաների, գեներալների, ՊՆ ղեկավարության հմուտ գործողությունների արդյունքում պատվով կատարում է իր առաջադրանքը, և անշուշտ ցանկալի է, որպեսզի ռազմի դաշտում արձանագրվող ձեռքբերումները և հաջողությունները ամրապնդվեն նաև քաղաքական-դիվանագիտական-քարոզչական հարթակներում, մի բան, ինչում թավշյա պաշտոնյաներն այսօր ակնհայտորեն թերանում են....

Այս թեմայով Ցանկացած ճգնաժամ գիտելիքի պակասից է, մեր բոլոր պրոբլեմների լուծման բանալին կրթությունն է. Նիկոլ Փաշինյան Ամեն անգամ, երբ թվում է՝ ցինիզմը, այնուամենայնիվ, սահմաններ ունի, Փաշինյանը հակառակն է ապացուցում. Սուրեն Սուրենյանց Ինչու Փաշինյանը արհամարհեց Բայդենի «հրաժեշտի» ընդունելությունը․ Սուրեն Սարգսյան Փաշինյանի և Ալիևի հնարավոր հանդիպման հարցը կախված է բացառապես նրանցից․ Լավրով Ցավալի է, որ խորանի առջևից հետևում է Ամենայն Հայոց դավաճանը՝ մարդ, ում «ջանքերով» պղծվել են տասնյակ ու տասնյակ օծյալ խորաններ. Ռուբեն Մելիքյան