Ռազմական դրության սահմանափակումները տնտեսական հետևանքներ են թողնում. Գորգիսյան

 ՀՀ ազգային ժողովի «Լուսավոր Հայաստան» խմբակցության պատգամավոր Գևորգ Գորգիսյանը կարծում է, որ Հայաստանում ռազմական դրությամբ պայմանավորված որոշ սահմանափակումներ տնտեսապես բացասական հետևանքներ են ունենում:

Գորգիսյանը նման տեսակետ հայտնեց ԱԺ արտահերթ նիստում Ռազմական դրությունը վերացնելու մասին օրենքի նախագծի քննարկմանը:

«Ռազմական դրության իրավական ռեժիմի մասին օրենքով ասվում է, որ ռազմական դրություն հայտարարելու համար հիմք ծառայած հանգամանքների վերացման դեպքում ռազմական դրությունը կարող է ամբողջությամբ կամ մասնակի դադարեցվել: Դա կարող է անել կառավարությունը կամ ԱԺ-ն: Հաշվի առնելով, որ ռազմական դրություն հայտարարելու մասին որոշման մեջ նշված հանգամանքներն այլևս չկան՝ «Լուսավոր Հայաստանը», «Բարգավաճ Հայաստանի» հետ համատեղ, նախաձեռնել է արտահերթ նիստ, որով առաջարկում է ընդունել ԱԺ որոշում՝ վերացնելու ռազմական դրությունը»,- ասաց պատգամավորը:

Նա նշեց, որ ռազմական դրության համար պայմաններ հանդիսացող իրավիճակը փոփոխվել է, բայց բոլոր սահմանափակումները դեռ շարունակում են մնալ: Պատգամավորը շեշտեց, որ այդ սահմանափակումները վերաբերում են ժողովրդավարության հիմքերին՝ խոսքի ազատությանը, մարդու ազատ տեղաշարժման իրավունքին, հավաքների և գործադուլների ազատությանը:

Գորգիսյանի կարծիքով՝ որոշ սահմանափակումներ տնտեսական տեսանկյունից ևս բացասական հետևանքներ են ունենում: «Բազմաթիվ անձինք, որոնք երկքաղաքացիություն ունեն, այսօր չեն կարողանում դուրս գալ ՀՀ-ից, որ կարողանան իրականացնել իրենց տնտեսական գործունեությունը, մեկնել արտագնա աշխատանքի և գումարներ ուղարկել Հայաստան: Այն քաղաքացիները, որոնք զորակոչվել են և դեռևս գտնվում են տարբեր զորամասերում, մշտական տեղակայման վայրերում, որևէ մարտական խնդիր չեն կատարում հիմա: Եվ շատ քաղաքացիներ, որոնք իրենց աշխատավայրը, տնտեսական գործունեությունը թողել և գնացել են, գտնվում են այդ իրավիճակում, չեն կարողանում զբաղվել իրենց տնտեսական գործունեությամբ»,- նշեց նա ու կարծիք հայտնեց, որ գործում են սահմանափակումներ, որոնց անհրաժեշտությունը չկա, և դա ունենում է տնտեսական հետևանքներ:

Պատգամավորը պատրաստակամություն հայտնեց առաջարկի ուժի մեջ մտնելը հետաձգել մի քանի օրով: