Օնիկ Գասպարյանը դեռ Շուշիի համար ա պատասխան տալու, ինչի օգնության խումբն ուշացավ․ Փաշինյան

ՀՀ վարչապետի պաշտոնակատար Նիկոլ Փաշինյանն Աբովյան քաղաքում բնակիչների հետ հանդիպմանը հայտարարեց, որ ՀՀ ԳՇ նախկին պետ Օնիկ Գասպարյանը պետք է պատասխան տա Արցախյան 44-օրյա պատերազմի ժամանակ Շուշիին օգնության գնացող խմբի՝ օրուկես ուշացումով հասնելու մասով:

Նրա խոսքով՝ Գասպարյանը պատասխան է տալու դատարանում: «Դուք կարող եք հիմա ինձ ասել, թե ինչու եմ այն ժամանակ նրան այդ պաշտոնին նշանակել. պարզ պատճառով՝ ես չէի կարող գնալ ու օտար երկրից գեներալ բերել, մեր գեներալներից պետք է նշանակվեր: ԳՇ պետ նշանակելուց առաջ՝ 2018-ին էլ, 2020-ին էլ, խորհրդակցել եմ ոլորտի մարդկանց հետ, ասել են՝ երկու մարդ կա, որ պատրաստ են լինել այդ պաշտոնին: Ես հենց այդ երկու մարդուն եմ նշանակել, օդից չեմ վերցրել: Այսօր այդ մարդիկ ինչ-որ հայտարարություններ են անում: Այն մարդը, ում ես գեներալ-լեյտենանտի ու գեներալ-գնդապետի կոչում եմ տվել, 10 մարդու ներկայությամբ իր ասածից հրաժարվում է: Օնիկ Գասպարյանը դեռ դատարանում պետք է բացատրի, թե Շուշիին օգնության հասնող խումբն ինչու է 1.5-2 օր ուշացումով տեղ հասել»,-նշեց ՀՀ վարչապետի պաշտոնակատարը:

Դիմելով իր քաղաքական հակառակորդներին՝ Փաշինյանն ասաց, որ եթե որևէ մեկին թվում է, թե ինքը նոյեմբերի 9-ից հետո խուսափելու է տարբեր դրվագների մասին խոսելուց, ապա դա այդպես չէ: Նա շեշտեց, որ այդ պատմությունը մինչև վերջին դետալը պետք է բացվի: