Դատախազի կողմից ՍԴ որոշումը քննադատելն անթույլատրելի է, դատախազը մարդ չէ, նա հանդես է գալիս ՀՀ֊ի անունից. Ալումյան

Դատախազները քննադատեցին ՍԴ որոշումն, ինչն անթույլատրելի է։ ՍԴ որոշումը վերջնական է, այն օրինական ուժի մեջ մտած դատական ակտ է։ Ցանկացած մարդ, անհատ կարող է կարծիք արտահայտել, քննադատել որոշումը, բայց դատախազությունը հանդես է գալիս ՀՀ անունից, ուստի՝ ՀՀ անունից պաշտոնապես հանդես եկող ոչ ոք չի կարող այդ դատական ակտը պաշտոնական մակարդակով քննադատել, դա անթույլատրելի է։ Այս մասին Վերաքննիչ քրեական դատարանում հայտարարել է ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը։

Ինչպես արդեն տեղեկացրել ենք՝ Ռոբերտ Քոչարյանի և մյուսների նկատմամբ քրեական հետապնդումը դադարեցնելու և գործի վարույթը կարճելու որոշման դեմ բողոքների գործով դատական նիստին մեղադրող դատախազ Գևորգ Բաղդասարյանը միջնորդություն է ներկայացրել դատարան՝ ՍԴ դիմելու և գործի վարույթը կասեցնելու մասին։

Պաշտպանության կողմը ժամանակ խնդրեց՝ դատական նիստի արձանագրությանը ծանոթանալու համար՝ միջնորդության վերաբերյալ դիրքորոշում, առարկություններ ներկայացնելու համար։

Բացի այդ՝ պաշտպան Հայկ Ալումյանը հայտարարեց, որ դատախազների կողմից ՍԴ որոշումը քննադատելն անթույլատրելի է, քանի որ դատախազը մարդ չէ, հանդես է գալիս պետության անունից։ Ինչ վերաբերում է դատախազի մատնանշած ՄԻԵԿ 6֊րդ՝ արդար դատաքննության հոդվածին, որը, ըստ Բաղդասարյանի տարածվում է նաև տուժող կողմի վրա, Ալումյանը նշեց, որ ՄԻԵԿ 6֊րդ հոդվածը դատախազությանը չի պաշտպանում։

«Ոչ, դատախազը մարդ չէ, երբ հանդես է գալիս ի պաշտոնե։ Դատախազությունը հանդես է գալիս պետության անունից, ԵԿ֊ն պաշտպանում է մարդուն ՀՀ֊ից, ոչ թե՝ ՀՀ֊ին՝ մարդուց»,- նշել է նա։

ՀՀ նախկին փոխվարչապետ Արմեն Գևորգյանի պաշտպան Էրիկ Ալեքսանյանն էլ նկատեց՝ տպավորություն է, որ դատախազությունը ՍԴ դիմելու վերաբերյալ միջնորդությամբ հաջողության չի հասել առաջին ատյանի դատարանում, քանի որ հիմքերը բացակայել են, որոշել է հաջողության հասնել Վերաքննիչ դատարանում, ինչն արդար չէ։ Ըստ Ալեքսանյանի՝ դատախազի կողմից ներկայացված վերաքննիչ բողոքի նպատակը եղել է ՍԴ դիմելու հարցը բարձրացնելը։ Սեյրան Օհանյանի պաշտպան Կարեն Մեժլումյանն էլ ավելացրեց, որ տպավորություն է, որ, եթե միջնորդությունը մերժվի՝ դատախազությունը կդիմի ՄԻԵԴ։

Դատական նիստը հետաձգվեց՝ մինչև հուլիսի 15֊ը։

Ինչպես արդեն տեղեկացրել ենք՝ մարտի 26-ին ՍԴ-ն ՀՀ քրեական օրենսգրքի 300.1-րդ հոդվածը ճանաչել է Սահմանադրության 78-րդ և 79-րդ հոդվածներին հակասող և անվավեր՝ բավարարելով ՀՀ երկրորդ նախագահ Ռոբերտ Քոչարյանի և Երևանի ընդհանուր իրավասության դատարանի դատավոր Դավիթ Գրիգորյանի դիմումները։

ՍԴ որոշումից հետո ՀՀ գլխավոր դատախազ Արթուր Դավթյանն այս գործով դիմել է ՍԴ, իսկ ՀՀ երկրորդ նախագահի և մյուսների գործով մեղադրանքը պաշտպանող դատախազները միջնորդություն են ներկայացրել՝ քրեական գործի վարույթը կասեցնելու մասին, իսկ պաշտպանական կողմը միջնորդություն էր ներկայացրել՝ քրեական հետապնդումը ՀՀ քրեական օրենսգրքի 300.1-րդ հոդվածով դադարեցնելու և այդ մասով քրեական գործի վարույթը կարճելու մասին։

Բացի այդ՝ Ռոբերտ Քոչարյանի պաշտպանները նաև միջնորդություն էին ներկայացրել՝ Ռոբերտ Քոչարյանի նկատմամբ ընտրված խափանման միջոց գրավի չափը նվազեցնելու կամ անազատության հետ կապ չունեցող այլ խափանման միջոցով փոխարինելու մասին։

Ապրիլի 6-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, արդարացման հիմքով դադարեցրել է Ռոբերտ Քոչարյանի, Յուրի Խաչատուրովի, Արմեն Գևորգյանի, Սեյրան Օհանյանի նկատմամբ քրեական հետապնդումն ՝ ՀՀ քրեական օրենսգրքի 300.1-րդ հոդվածի հատկանիշներով։ Միևնույն ժամանակ դատարանը մերժել է Ռոբերտ Քոչարյանի պաշտպանների՝ խափանման միջոցի վերաբերյալ միջնորդությունը։

«Փաստինֆո»-ի հաղորդմամբ՝ դատախազ Գևորգ Բաղդասարյանը վերաքննիչ բողոք է ներկայացրել՝ պահանջելով բեկանել առաջին ատյանի դատարանի որոշումը, Ռոբերտ Քոչարյանի և մյուսների նկատմամբ քրեական հետապնդումը դադարեցնելու մասին դատարանի որոշումը բողոքարկել է նաև տուժող կողմը։ Բացի դա՝ պաշտպանության կողմը ևս վերաքննիչ բողոք է ներկայացրել՝ վիճարկելով Ռոբերտ Քոչարյանի խափանման միջոցը փոխելու կամ գրավի չափը նվազեցնելու միջնորդությունը մերժելու մասին որոշման մասով։