Գիտնականները պարզել են, թե օրական որքան ջուր է պետք խմել նիհարելու և երիկամների առողջության համար

Սան Ֆրանցիսկոյում Կալիֆորնիայի համալսարանի ամերիկացի գիտնականներն ուսումնասիրել են, թե ինչպես է ամենօրյա բավարար քանակությամբ ջրի օգտագործումը ազդում մարդու առողջության վրա: Հետազոտությունը հրապարակվել է JAMA Network Open գիտական ​​ամսագրում։

«Նման համատարած և պարզ միջամտության օգուտները հստակ հաստատված և պարզ չէին, ուստի ուզում էինք դրանք ավելի մանրամասն դիտարկել», - ասել է աշխատանքի ավագ հեղինակ, պրոֆեսոր Բենջամին Բրոյերը:

Փորձագետները վերլուծել են 18 պատահական փորձարկումների արդյունքները, որոնք առնչվում էին համակարգված ջուր խմելուն:

Արդյունքները ցույց են տվել, որ օրական ութ բաժակ կամ երկու լիտր ջուր խմելը զգալիորեն նվազեցնում է երիկամներում քարերի առաջացման հավանականությունը: Իսկ մոտ վեց բաժակ կամ օրական 1,5 լիտր ջուրը նպաստում է քաշի կորստին։

Գիտնականները նաև պարզել են, որ օրական երկու լիտրից ավելի ջուր խմելը ոչ մի օգուտ չի բերում նշված չափաբաժինների համեմատ։

Մասնագետները նաև պարզել են, որ սննդակարգում բավարար քանակությամբ ջուր օգտագործելը կարող է օգնել կանխարգելել միգրենը, վերահսկել շաքարախտը ու արյան ցածր ճնշումը, ինչպես նաև նպաստել միզուղիների վարակների կանխարգելմանը:

Կրկնվող գլխացավեր ունեցող մեծահասակներն իրենց ավելի լավ են զգում երեք ամիս ավելի շատ ջուր խմելուց հետո: Իսկ օրական մոտ չորս լրացուցիչ բաժակ ջուր խմելն օգնում է դիաբետիկ հիվանդներին, որոնց արյան մեջ գլյուկոզայի մակարդակը բարձր է:

Հեղինակները պնդում են, որ ուտելուց առաջ ջուր խմելու խրախուսումը կլինի պարզ, էժան միջամտություն, որը կարող է հսկայական օգուտներ տալ՝ հաշվի առնելով գիրության տարածվածության աճը: