Կողմերը գործի նյութերի հետազոտման կարգի առնչությամբ առաջարկներ արեցին. ՍԴ դատավորները գնացին խորհրդակցության

Արտահերթ խորհրդարանական ընտրությունների արդյունքները վիճարկելու գործով նիստից Սահմանադրական դատարանի դատավորները հեռացան խորհրդակցության՝ վերջնական որոշում կայացնելու գործի նյութերի հետազոտման կարգի առնչությամբ. դիմող և պատասխանող կողմերը ներկայացրել էին իրենց առաջարկները:

ՍԴ նախագահ Արման Դիլանյանը ներկայացրեց գործի նյութերի հետազոտման առնչությամբ իր կարծիքը: Նա հիշեցրեց կարճ ժամկետների մասին: Որոշում կայացնելու համար ՍԴ-ն ունի 8 օր, վերջնաժամկետը հուլիսի 17-ն է:

Ըստ Դիլանյանի առաջարկի՝ նախ հանդես կգան դիմողները՝ դիմումները մուտքագրելու հերթականությամբ, այնուհետև պատասխանողը, հարակից պատասխանողները՝ դատախազությունը, ոստիկանությունը, Հեռուստատեսության և ռադիոյի հանձնաժողովը, որից հետո երրորդ կողմը՝ ՔՊ-ն….

«Հայաստան» դաշինքի ներկայացուցիչ Արամ Վարդևանյանն առաջարկեց դիտարկել նաև աշխատանքային օրվա ավարտից հետո նիստը շարունակելու հնարավորությունը: Նա իր դիտարկումը ներկայացրեց նաև կողմերին տրվող ժամանակի վերաբերյալ: «Ժամանակային սահմանափակումը կարող է լինել որպես ելակետ, բայց 1 ժամն ավարտելուն պես ասել, որ այլևս չես կարող դիրքորոշում ներկայացնել, ահա դրա հետ ես խնդիր ունեմ: Մենք դա կարող ենք դիտարկել որպես ելակետ, բայց ոչ որպես կոշտ սահմանափակման միջոց»,- ասաց Վարդևանյանը՝ կարգի վերաբերյալ այլ դիտարկումներ ևս ներկայացնելով:

«Զարթոնքի» ներկայացուցիչ Արա Զոհրաբյանը նշեց. «Մենք նույնպես կարծում ենք, որ բացատրություններ տալու իրավունքը չի կարող սահմանափակվել որևէ ժամանակով»:

Զոհրաբյանն առաջարկեց նաև, որ դիմումատուները ըստ դիմումների ներկայացման հերթականության հանդես գան, բայց յուրաքանչյուր դիմումատուի բացատրությունից հետո լսեն ԿԸՀ-ի բացատրությունը այդ դիմումի վերաբերյալ:

«Հայոց հայրենիքի» ներկայացուցիչ Արտակ Գալստյանը, սակայն, նշեց, որ 1 ժամը բավարար է ներկայացնելու համար: Նա ևս առաջարկեց բացատրությունից հետո լսել պատասխանողին:

«Պատիվ ունեմ» դաշինքի ներկայացուցիչ Դավիթ Հարությունյանը, անդրադառնալով միջնորդությանը, ասաց. «Ես խնդրում եմ, որ ՍԴ-ն վերանայի իր աշխատակարգային որոշումը և սահմանի ԿԸՀ-ի համար 1-ական ժամ՝ յուրաքանչյուր դիմողին արձագանքելու նպատակով»:

Նա շեշտեց՝ եթե կողմերին 1 ժամ է տրվում բացատրություն տալու, ապա ԿԸՀ-ն էլ 1 ժամ պետք է ունենա՝ արձագանքելու համար: Նա հաջորդականության վերաբերյալ ևս իր դիտարկումները ներկայացրեց:

Պատասխանող կողմից ԿԸՀ նախագահ Տիգրան Մուկուչյանը, անդրադառնալով ժամկետներին՝ շեշտեց, որոշակի ժամկետ պետք է արձանագրել, դրանով տևողությունը սահմանել, բայց, եթե կողմը ցանկանում է ավելացնել լրացուցիչ 5-10 րոպե, ապա խոչընդոտ չպետք է լինի: ԿԸՀ-ն ևս ակնկալում է ամեն բացատրությունից հետո ներկայացնել արձագանք:

Իրենց տեսակետները ներկայացրեցին նաև հարակից պատասխանողները, դատավորները: Դիլանյանը հայտնեց, որ դատարանը հեռանում է խորհրդակցության՝ լուծելու համար նշված հարցերը: