«Ռուսաստանը ֆոսֆորային ռումբեր է օգտագործում». Լուգանսկի շրջանի ղեկավար

Լուգանսկի շրջանի ղեկավարության տվյալներով՝ վերջին 24 ժամվա ընթացքում ռուսական հարվածների զոհ է դարձել չորս մարդ, որոնցից երկուսը երեխաներ են, ևս վեցը վիրավոր են։

Ավելի շատ զոհեր կարող են լինել առաջին հերթին Ռուբիժնեյում, որտեղ, ըստ Լուգանսկի շրջանային նահանգային վարչակազմի ղեկավար Սերգեյ Գայդայի, ռուսները ֆոսֆորային ռումբեր են նետել։

«Իրավիճակը շատ բարդ է Ռուբիժնեյում, որտեղ մարտերը շարունակվում են քաղաքի կենտրոնում։ Ըստ հաստատված տեղեկությունների՝ ունենք չորս զոհ, որոնցից երկուսը երեխաներ են, վեցը՝ վիրավոր», - ասել է Գայդայը։

Նաև, ըստ վարչակազմի ղեկավարի, մեկ օրվա ընթացքում մարզում վնասվել կամ հիմնովին ավերվել է 23 բնակելի շենք՝ 10 բարձրահարկ և 13 առանձնատուն։ Շրջանի ավելի քան 100 հազար բնակիչ մնում է առանց էլեկտրականության։