Մեծ Բրիտանիան ընդլայնել է պատժամիջոցները Ռուսաստանի դեմ

Մեծ Բրիտանիայի իշխանությունները սեւ ցուցակում են ներառել ռուսական մի քանի բանկեր, ընկերություններ եւ պաշտպանական ոլորտի ձեռնարկություններ: Ինչպես նշվում է հինգշաբթի պատժամիջոցների թարմացված ցանկում, սահմանափակող միջոցները տարածվել են ընդհանուր 59 ֆիզիկական եւ իրավաբանական անձի վրա, փոխանցում է ՏԱՍՍ-ը։

Սեւ ցուցակում են հայտնվել «Սբերբանկ»-ի ղեկավար Գերման Գրեֆը, բանկի խորհրդի նախագահի առաջին տեղակալ Ալեքսանդր Վեդյախինը եւ խորհրդի նախագահի նախկին առաջին տեղակալ Լեւ Խասիսը, ձեռնարկատերեր Օլեգ Տինկովը եւ Եվգենի Շվիդլերը, ՌԴ Անվտանգության խորհրդի քարտուղար Նիկոլայ Պատրուշեւի որդին՝ Անդրեյը Պատրուշեւը:

Պատժամիջոցներ են կիրառվել «Գազպրոմ»-ի խորհրդի նախագահի տեղակալ Օլեգ Ակսյուտինի, «Ռոսնեֆտ»-ի առաջին փոխնախագահ բելգիացի Դիդիե Կասիմիրոյի, շելֆային նախագծերի գծով Խորվաթիայի փոխնախագահ Զելյկո Ռունյեի եւ «Ռոսնեֆտի» գործադիր տնօրեն Իգոր Սեչինի որդու՝ Իվան Սեչինի նկատմամբ։

Սահմանափակումները տարածվել են փոխվարչապետ, Հեռավորարեւելյան դաշնային օկրուգում ՌԴ նախագահի լիազոր ներկայացուցիչ Յուրի Տրուտնեւի, Հյուսիսարեւմտյան, Ուրալի, Վոլգայի եւ Սիբիրի դաշնային շրջաններում լիազոր ներկայացուցիչներ Ալեքսանդր Գուցանի, Վլադիմիր Յակուշեւի, Իգոր Կոմարովի եւ Անատոլի Սերիշեւի, ինչպես նաեւ պաշտպանության փոխնախարար Դմիտրի Բուլգակովի վրա:

Պատժամիջոցների տակ են հայտնվել նաեւ Պոլինա Կովալյովան, որին Մեծ Բրիտանիայի ԱԳՆ-ն ՌԴ ԱԳ նախարար Սերգեյ Լավրովի խորթ դուստր է անվանում, եւ Մելիտոպոլի (Ուկրաինա) քաղաքապետի պաշտոնակատար Գալինա Դանիլչենկոն։ Այս անձանց արգելված է մուտքը Մեծ Բրիտանիա, իսկ ակտիվները, եթե այդպիսիք հայտնաբերվեն, ենթակա են սառեցման:

Պատժամիջոցները տարածվել են նաեւ «Գազպրոմբանկ»-ի, «Ռոսսելխոզբանկ»-ի, «Ալֆա-բանկ»-ի, «ՍՊՄ բանկ»ի եւ Ուրալի Վերակառուցման եւ զարգացման բանկի վրա:

Պատժամիջոցներ են կիրառվել «Ռուսական երկաթուղիներ»-ի, «Սովկոմֆլոտ» ընկերությունների խմբի, «Ռուսհիդրո»-ի, «ԱԼՌՈՍԱ» ալմաստ արդյունահանող ընկերությունների խմբի, Սալավատի քիմիական գործարանի, Ռուսաստանի արտահանման վարկերի եւ ներդրումների ապահովագրման գործակալության, Ռազմարդյունաբերական համալիրի ձեռնարկությունների եւ էլեկտրոնիկա արտադրողների դեմ: Դրանց թվում են ակադեմիկոս Վ.Պ. Մակեեւի անվան պետական ​​հրթիռային կենտրոնը, «Տիտան-բարիկադներ» դաշնային գիտաարտադրական կենտրոնը, Ավիացիոն նյութերի համառուսաստանյան ինստիտուտը, «Ռադիոավտոմատիկա» էլեկտրոնիկայի մատակարարը, «Պաշտպանական նախաձեռնություններ» ՍՊԸ-ն, որը ռադիոԷլեկտրոնային պատերազմի միջոցներ է արտադրում, ԱԹՍ-ների արտադրության «Կռոնշտատդ»-ը:

Սեւ ցուցակում է նաեւ «Վագներ» ընկերությունը։ Ավելի վաղ Մեծ Բրիտանիայի վարչապետ Բորիս Ջոնսոնը հայտարարել էր, որ արեւմտյան երկրները մտադիր են նոր պատժամիջոցներ կիրառել Ռուսաստանի դեմ, որոնց թվում կլինի նաեւ  «Վագներ» մասնավոր ռազմական ընկերությունը:

«Պետք է մեծացնել ճնշումը Ռուսաստանի վրա՝ այսօր ավելի շատ պատժամիջոցներ կիրառելով, այդ թվում՝ «Վագներ» խմբի դեմ», - ասել է Ջոնսոնը։ Նա նաեւ ընդգծել է Ուկրաինային արեւմտյան երկրների կողմից ցուցաբերվող աջակցության ուժեղացման անհրաժեշտությունը, այդ թվում՝ Կիեւին լրացուցիչ սպառազինության փոխանցումը։ «Մենք պետք է անհրաժեշտ օգնություն ու պաշտպանություն տրամադրենք ուկրաինացիներին»,- ասել է Մեծ Բրիտանիայի վարչապետը։ Նա նաեւ նշել է, որ ստեղծված իրավիճակում ՆԱՏՕ-ն ամրապնդում է համագործակցությունը կիբերոլորտում։

Միացյալ Բրիտանիայի սահմանափակումների տակ են հայտնվել նաեւ զենքի նոր համակարգերի բելառուսական նախագծող «ՕԿԲ ՏՍՊ»-ն, Բելառուսի պետական ​​ռազմաարդյունաբերական կոմիտեն, Մինսկի անվաքարշակների գործարանը, «Բելսպեցվնեշտեխնիկա»-ն, որը զենքի եւ ռազմական տեխնիկայի մշակմամբ է զբաղվում:

Մեկնաբանելով սահմանված պատժամիջոցները՝ Մեծ Բրիտանիայի արտաքին գործերի նախարար Լիզ Թրասն ընդգծել է, որ Լոնդոնը մտադիր չէ դադարեցնել նոր պատժամիջոցների մշակումը Ռուսաստանի դեմ: