ՄԱԿ-ի Գլխավոր ասամբլեան հակառուսական բանաձև է ընդունել

ՄԱԿ-ի Գլխավոր ասամբլեան Ուկրաինայում հումանիտար իրավիճակի վերաբերյալ հակառուսական բանաձեւ է ընդունել, փոխանցում է «ՌԻԱ Նովոստին»։

Բանաձեւին կողմ է քվեարկել 140, ձեռնպահ՝ 38, դեմ են եղել Բելառուսը, Էրիթրեան, Հյուսիսային Կորեան, Ռուսաստանը եւ Սիրիան։ Հայաստանը ՄԱԿ-ի հակառուսական բանաձևին ձեռնպահ է քվեարկել։

Գլխավոր ասամբլեայի ընդունած բանաձեւում նշվում է, որ այն «պահանջում է Ռուսաստանի Դաշնության կողմից Ուկրաինայի դեմ ռազմական գործողությունների անհապաղ դադարեցում»։ Եվ նաև նշվում է, որ «Ռուսաստանի ռազմական հարձակումը Ուկրաինայի տարածքի վրա և դրա հումանիտար հետևանքները հասնում են այնպիսի չափերի, որոնք միջազգային հանրությունը տասնյակ տարիներ չի տեսել Եվրոպայում»: Բացի այդ, պահանջվում է դադարեցնել քաղաքների, մասնավորապես՝ Մարիուպոլի շրջափակումը։

Փաստաթուղթը նաև կոչ է անում իրականացնել մարտի 2-ին ՄԱԿ-ի Գլխավոր ասամբլեայի կողմից ընդունված բանաձևը (դրանում Ռուսաստանին կոչ է արվել դադարեցնել հատուկ ռազմական գործողությունը Ուկրաինայում և դուրս բերել իր զորքերը, ինչպես նաև դատապարտել է Ռուսաստանի Դաշնության` իր միջուկային ուժերի պատրաստվածությունը բարձրացնելու որոշումը»):

Զուտ հումանիտար թեզերի թվում կան քաղաքացիական անձանց և քաղաքացիական ենթակառուցվածքների, լրագրողների և բժիշկների պաշտպանության պահանջներ։ Պահանջվում է նաև  ապահովել քաղաքացիական անձանց, այդ թվում՝ օտարերկրացիների համար անվտանգ անցումը։

Ընդունված բանաձեւի համաձայն՝ Գլխավոր ասամբլեան կողմերից պահանջում է ապահովել մարդասիրական անվտանգ մուտք, դատապարտում է հումանիտար իրավունքի խախտումները և կոչ է անում իրականացնել այն։

Բանաձեւի նախագիծը համահեղինակել են ԱՄՆ-ը, Ուկրաինան, Մեծ Բրիտանիան, Վրաստանը, Գերմանիան, Լիտվան եւ Լատվիան։