Ուկրաինայի արտգործնախարարը հերքել է Էրդողանին

«Թուրքիայի նախագահ Ռեջեփ Թայիփ Էրդողանի նշած չորս կետերի շուրջ Ռուսաստանի հետ կոնսենսուս չկա»: Այս մասին հայտարարել է Ուկրաինայի արտգործնախարար Դմիտրի Կուլեբան։

Նրա խոսքով՝ Ուկրաինայում միակ պետական ​​լեզուն ուկրաիներենն է և այդպես էլ կլինի։ Կուլեբան շնորհակալություն է հայտնել թուրքական կողմին և նախագահ Էրդողանին` քաղաքական ու հումանիտար օգնության, ինչպես նաև Ուկրաինայի դեմ Ռուսաստանի պատերազմին վերջ տալու դիվանագիտական ​​ջանքերի համար։

Միաժամանակ, ըստ Կուլեբայի, սխալ է բանակցությունների առանցքային թեմաների դասակարգումը չորս կամ մի քանի կետերի։

«Պատվիրակությունների ենթախմբերում միաժամանակ շատ տարբեր հարցեր են քննարկվում։ Բանակցային գործընթացը շատ ծանր է ընթանում: Ուկրաինայի պատվիրակությունը չի հրաժարվում իր պահանջներից: Մենք պնդում ենք, առաջին հերթին, հրադադարի, Ուկրաինայի անվտանգության և տարածքային ամբողջականության երաշխիքների մասին»,- ասել է Կուլեբան։

Նա հավելել է, որ Ուկրաինան կշարունակի երկխոսությունը Թուրքիայի և այլ շահագրգիռ կողմերի հետ՝ ուկրաինական հողում խաղաղությունը վերականգնելու համար։

«Մենք հուսով ենք, որ Թուրքիան՝ որպես Ուկրաինայի բարեկամ և ռազմավարական գործընկեր, նույնպես կշարունակի աջակցել բոլոր ուղղություններով։ Ռուսաստանի դեմ նոր պատժամիջոցների սահմանումը և Ուկրաինայի պաշտպանունակության ամրապնդումը ոչ պակաս կարևոր գործոններ են ռուսական ռազմական մեքենան կանգնեցնելու և բանակցություններում ցանկալի առաջընթացի հասնելու համար»,- ընդգծել է Կուլեբան։