Զելենսկին խոսել է ռուս-ուկրաինական բանակցությունների մասին

Ուկրաինայի նախագահ Վլադիմիր Զելենսկին նշել է, որ Ռուսաստանի հետ բանակցություններում Ուկրաինայի տարածքային ամբողջականության և ինքնիշխանության հարցում որևէ փոխզիջում չկա և չի լինելու։

«Այն ազդանշանները, որ մենք լսում ենք բանակցային հարթակից, կարելի է անվանել դրական, բայց այդ ազդանշանները չեն խլացնում ռուսական արկերի պայթյունները։

Իհարկե, մենք տեսնում ենք բոլոր ռիսկերը։ Իհարկե, մենք հիմք չենք տեսնում վստահելու մի պետության առանձին ներկայացուցիչների խոսքին, որը շարունակում է պայքարել մեր կործանման համար։ Ուկրաինացիները միամիտ մարդիկ չեն:

Ուկրաինացիները և՛ այս 34 օրվա ներխուժման ընթացքում, և՛ Դոնբասում պատերազմի վերջին ութ տարիների ընթացքում արդեն սովորել են, որ կարելի է վստահել միայն կոնկրետ արդյունքի»,- ասել է Ուկրաինայի նախագահը։

Զելենսկին ուկրաինացիներին զգոնությունը չկորցնելու կոչ է արել: «Իրավիճակն ավելի թեթև չի դարձել, մարտահրավերների մասշտաբները չեն նվազել։ Ռուսական բանակը դեռևս մեծ ներուժ ունի շարունակելու հարձակումները մեր պետության դեմ: Նրանք դեռ շատ տեխնիկա ունեն և բավականաչափ լիովին իրավազրկված մարդիկ, որոնց կարող են ուղարկել պատերազմի կաթսա»,- ասել է նա։