Ռուսաստանը դուրս է բերում ռազմական տեխնիկան Կիևի մերձակայքից. Ուկրաինայի ԶՈւ

«Հինգշաբթի լույս մարտի 31-ի գիշերը ռուսական զորքերը Կիևի մերձակայքից դուրս են բերել մոտ 700 միավոր զինտեխնիկա դեպի Բելառուսի հետ սահման»,- այս մասին Կիեւում կայացած ճեպազրույցում հայտարարել է Ուկրաինայի Զինված ուժերի ցամաքային զորքերի հրամանատարության շտաբի պետի տեղակալ, բրիգադային գեներալ Ալեքսանդր Գրուզեւիչը։

Նա ենթադրել է, որ ռուսական զորքերը կա՛մ վերատեղակայում են, կա՛մ ուժերը տեղափոխում Դոնբաս:

«Մենք դիտարկում ենք երկու տարբերակ՝ կա՛մ վերադասավորում, վերախմբավորում և մեր ուժերի վերագնահատում։ Բայց հաշվի առնելով գործողությունների դինամիկան ամբողջ Ուկրաինայում, մեծ է հավանականությունը, որ դուրս բերվող գումարտակային մարտավարական խմբերը կհայտնվեն Դոնբասում: Որովհետեւ ոչ միայն Կիեւի մարզում, այլեւ գրեթե բոլոր ուղղություններով հակառակորդը սպառել է իր հարձակողական ներուժը։ Նա պետք է վերականգնի իր ուժերը, որպեսզի շարունակի հարձակողական գործողությունները»,- բացատրել է Գրուզեւիչը։

Միևնույն ժամանակ նա հավելել է, որ Կիևի շուրջը ռուսական բավականին մեծ ուժեր են մնացել։

«Վախենալու բան չկա, բայց դրանք կարող են վնաս պատճառել։ Այնուամենայնիվ, կարծում եմ, մեկ-երկու օր մենք կտեսնենք հիանալի պատկեր և կշարունակենք զարգացնել մեր հաջողությունները։ Բայց սրա հետ մեկտեղ չպետք է նվազեցնել թշնամու ուժը, քանի որ այսօր Կիևի շրջակայքում նրանք շատ են, որպեսզի փորձեն ի պատասխան ինչ-որ հարված հասցնել։ Խոսքը, առաջին հերթին, վերաբերում է հրթիռային հարվածներին, որոնք ամեն օր շարունակվում են և ավելանում են ամեն օր»,- ասել է Գրուզևիչը։

Նա նաև բացառել է ռուսական զորքերի Կիև ներթափանցման հնարավորությունը։

«Նրանք հաստատ Կիևում չեն լինի: Այսպիսով, չպետք է անհանգստանաք: Ինչ վերաբերում է Կիևի շրջանին, ապա ակտիվ միջոցներ են ձեռնարկվում և իրականացվում մեր բնակավայրերի ազատագրման համար»,- ասել է գեներալը։