Լիտվան ԵՄ առաջին երկիրն է, որն ամբողջությամբ հրաժարվել է ռուսական գազից

Ապրիլի սկզբից Լիտվան ամբողջությամբ դադարեցրել է գազի ներկրումը Ռուսաստանից՝ դառնալով ԵՄ առաջին երկիրը, որը նման քայլի է դիմել։

LRT-ի փոխանցմամբ՝ այս մասին հայտարարել է Լիտվայի էներգետիկայի նախարարությունը, գրում է European Truth-ը։

Նախարարությունից հայտնել են, որ ապրիլի սկզբից Լիտվայի գազահաղորդման համակարգը Ռուսաստանի Դաշնությունից գազ չի ներմուծել։ Դա հաստատում են Amber Grid օպերատորի տվյալները. ըստ նրանց՝ ապրիլի 2-ի դրությամբ Բելառուսի հետ ինտերկոննեկտորով ռուսական գազի ներկրումը Լիտվա զրոյական է եղել։

Այժմ Լիտվայի գազի բոլոր կարիքները բավարարվում են Կլայպեդայում հեղուկացված բնական գազի տերմինալի միջոցով ներմուծման շնորհիվ: Ըստ հաշվարկների՝ ապագայում սա պետք է բավարար լինի։

Անհրաժեշտության դեպքում գազը կարելի է ստանալ նաև Լատվիայից, իսկ մայիսի 1-ից՝ Լեհաստանի հետ ինտերկոննեկտորի միջոցով։

Էներգետիկայի նախարար Դաինյուս Կրեյվիսը դա անվանել է Լիտվայի էներգետիկ անկախության շրջադարձային կետ:

«Մենք ԵՄ առաջին երկիրն ենք «Գազպրոմից» գազ ստացողների թվում, որն անկախացել է Ռուսաստանից գազի մատակարարումից»,- ասել է նա։