Բլինկենը հայտարարել է սառը պատերազմին փոխարինած ժամանակաշրջանի ավարտի մասին

ԱՄՆ պետքարտուղար Էնթոնի Բլինկենը հայտարարել է միջազգային հարաբերություններում նոր ժամանակաշրջանի գալու մասին, փոխանցում է ՏԱՍՍ-ը։

«Մենք նորից հայտնվել ենք պատմության հորձանուտում։ <...> Ավելի համառ Չինաստանը մարտահրավեր է նետում կանոնների վրա հիմնված աշխարհակարգին, որը երկար ժամանակ հիմք է հանդիսացել ամերիկացիների և ամբողջ աշխարհի ժողովուրդների անվտանգության և բարգավաճման համար: Սառը պատերազմից հետո ընկած ժամանակաշրջանն ավարտվել է»,- ասել է նա Պետդեպարտամենտի 61-րդ պետքարտուղար Ջեյմս Բեյքերի (1989-1992) կիսանդրին կանգնեցնելու արարողության ժամանակ:

Բեյքերը մասնակցել է արարողությանը և խոսել աշխարհում տեղի ունեցող իրադարձությունների մասին՝ նշելով, որ «Ուկրաինայում պատերազմի քամիները ուժգին են փչում»։ Նա Ռուսաստանի Դաշնության և Ուկրաինայի հետ հարաբերություններում արևմտյան երկրների գլխավոր խնդիրն անվանել է «բռնության չտարածման» անհրաժեշտությունը և ընդգծել, որ ստեղծված իրավիճակում հաղթանակ տոնելը դեռ վաղ է։

«Կարծում եմ՝ դեռ վաղ է հաղթանակ տոնելու համար։ Որոշ մարդիկ հիմա հակված են հաղթանակ տոնելու։ Կարծում եմ՝ դեռ վաղ է դա անել»,- ընդգծել է նախկին պետքարտուղարը։