Պետդուման զգուշացնում է՝ ՆԱՏՕ-ի բազաների տեղակայումը քաղաքներում վտանգավոր է

Պետդումայի նախագահ Վյաչեսլավ Վոլոդինը մեկնաբանել է Ֆինլանդիայի Լապենրանտայի քաղաքապետի առաջարկները՝ Ֆինլանդիայում ՆԱՏՕ-ի բազա տեղակայելու վերաբերյալ։ Քաղաքապետը կարծում է, որ նման որոշումը կստեղծի անվտանգության զգացում։ «Սխալ է։ Ռազմական գործողությունների բռնկման դեպքում՝ հարվածներ են հասցվում հիմնականում հակառակորդի ռազմական ենթակառուցվածքին»,- գրել է Վոլոդինը Telegram-ի իր ալիքում։

Նրա խոսքով՝ Հյուսիսատլանտյան դաշինքի բազաների տեղակայումը չի պաշտպանի ոչ Ֆինլանդիան, ոչ Շվեդիան, ընդհակառակը, այն կվտանգի այն քաղաքների բնակիչներին, որտեղ տեղակայված կլինեն ռազմական ենթակառուցվածքները։

Ավելի վաղ Դաշնային խորհրդի արտաքին հարաբերությունների կոմիտեի նախագահի առաջին տեղակալ Վլադիմիր Ջաբարովը հայտարարել էր, որ Ֆինլանդիայում ՆԱՏՕ-ի բազաների տեղակայումը կարող է հանգեցնել զինված հակամարտության։

Հունիսի 29-ին Մադրիդում կայացած գագաթնաժողովում դաշինքը հավանություն է տվել Շվեդիայի և Ֆինլանդիայի անդամակցությանը ՆԱՏՕ֊ին։ Սպասվում է, որ դաշինքին միանալու հրավեր ստանալուց հետո կողմերը պետք է համաձայնեցնեն մուտքի պայմանները։ Շվեդիան և Ֆինլանդիան կդառնան ՆԱՏՕ-ի անդամներ, երբ դաշինքի անդամ բոլոր երկրների խորհրդարանները վավերացնեն այս որոշումը։

Ավելի վաղ Թուրքիան համաձայնել էր Ֆինլանդիայի և Շվեդիայի՝ դաշինք մտնելուն։ Անկարան մայիսի 18-ից արգելափակել էր նրանց անդամակցությունը քրդական կազմակերպություններին աջակցելու պատճառով, որոնց Թուրքիան համարում է ահաբեկիչներ։