Թուրքիայի խոշոր քաղաքներում մեկնարկել է «Դուրս գանք ՆԱՏՕ-ից» արշավը

Թուրքական «Հայրենիք» կուսակցությունը Թուրքիայի խոշոր քաղաքներում սկսել է երկիրը ՆԱՏՕ-ից դուրս բերելու լայնածավալ արշավ, քաղաքացիները ակտիվորեն ստորագրում են կոչը։ Այս մասին գրում է РИА Новости-ն՝ Aydınlık թերթին հղումով։

«Թուրքական Vatan (Հայրենիք) կուսակցությունը մտադիր է երկրի կառավարությանը առաջարկել դուրս գալ ՆԱՏՕ-ից, դաշինքի դեմ քաղաքականությունը կարևոր է Թուրքիայի տնտեսական ապագայի համար»,֊ ավելի վաղ հայտարարել էր կուսակցության գլխավոր քարտուղար Դողու Փերինչեքը։ «Հայրենիքը» ներկայացված չէ Թուրքիայի Ազգային մեծ ժողովում (խորհրդարանում), ակտիվորեն պաշտպանում է Թուրքիայի սերտ քաղաքականությունը եվրասիական տարածքի հետ, կոչ է անում Անկարային ճանաչել Ղրիմի վերամիավորումը Ռուսաստանին։

Vatan (Հայրենիք) կուսակցության կողմից ամբողջ երկրում մեկնարկած «Դուրս գանք ՆԱՏՕ-ից» արշավն արժանացավ հասարակության բոլոր շերտերի հետաքրքրությանը: Ակցիային աջակցեցին քաղաքաբնակները, ովքեր մոտեցան քաղաքների և շրջանների հրապարակներում տեղադրված ստորագրությունների սեղաններին: 

Թերթի հետ զրույցում Vatan կուսակցության ղեկավարներն ասել են, որ քարոզարշավին աջակցությունն արտացոլում է ժողովրդի պահանջները։