«Քանի դեռ Նիկոլ Փաշինյանը կա, Ջհանգիրյանը առոք-փառոք շարունակելու է իր կենսագործունեությունը»

Արդյոք Գագիկ Ջհանգիրյանը կկանգի դատարանի առջև՝  հրապարակված ձայնագրության և դրան իր կողմից տրված մեկնաբանություններից հետո: ԼՈՒՐԵՐ.com-ի հետ զրույցում քաղաքագետ Բենիամին Մաթևոսյանը նշեց, որ քանի դեռ մեր երկրի ղեկավարը Նիկոլ Փաշինյանն է, ապա ո′չ Գագիկ Ջհանգիրյանը, ո′չ էլ որևէ այլ պաշտոնյա պատասխանատվության չի ենթարկվի:

«Եթե դու կարողանում ես պատերազմ հրահրել,  պատերազմի մենեջմենթն այնպես տանել, որ  պարտվես, բայց հետո բանավոր բանակցություններով հասնես այն բանին,  որ հանձնես այն, ինչը  չպետք  է հնձնեիր ու պատասխանատվության չենթարկվես, ապա հարց է առաջանում՝  ինչու  պետք է Գագիկ Ջհանգիրյանը պատասխանատվության ենթարկվի, ինչի համար»,-նշեց Բ. Մաթևոսյանը: 

Նրա խոսքով՝   այն մարդիկ, ովքեր 2018թ. ժողովրդավարությունից էին խոսում, բողոքում էին դատաիրավական համակարգից, նրանց  բողոքը ոչ թե դատավորների՝ իշխանության կողմից վերահսկվելն էր, այլ  այն, որ իրենք չեն վերահսկում դատավորներին: 

 «Ջհանգիրյանի փոխարեն ով էլ լիներ, նույն բանն էր անելու: Սա ընդամենը մեկ ձայնագրություն է, պատկերացրեք, թե  որքան չհրապարակված ձայնագրություններ կան, և ինչպես են նրանք աշխատում ու, առհասարակ, վերաբերվում հասարակությանը»,-հավելեց նա:

Վերջինս ընդգծեց, որ իրավական առումով անգամ սորոսոկան թևն է  քննադատել իշխանություններին Գ. Ջհանգիրյանի  իրականացրած գործողությունների վերաբերյալ:

«Այնտեղ նշվում է, որ  Գ. Ջհանգիրյանի խոսքում առնվազն  հանցակազմ կար առ այն, որ ինքը փաստորեն կանխել է մի քանի  քրեական գործի հարուցում.  այդ դեպքում հարց է առաջանում, թե  ինչի համար էին 2018 թ, գործողությունները,   եթե հիմա այս մարդիկ  եկել  և որոշում են,  թե ում դեմ պետք է քրեական գործ հարուցել,  ում դեմ՝ ոչ:   Քանի դեռ Նիկոլ Փաշինյանը կա,  Ջհանգիրյանը առոք-փառոք  շարունակելու է իր կենսագործունեությունը  եթե  ոչ ԲԴԽ նախագահի պաշտոնում, ապա, վստահ եմ, ուրիշ  այլ տարբերակով՝ որպես  իշխանական համակարգում  ներգրավված անձ»,-եզրափակեց նա: