Կներքաշվի՞ Վրաստանը ՌԴ-ի դեմ նոր պատերազմի մեջ․ ընդդիմությունը «պատին է սեղմում» Թբիլիսիին

Վրաստանում առաջարկել են հանրաքվե անցկացնել Ռուսաստանի դեմ «երկրորդ ճակատի» բացման հարցով։ Մասնավորապես, իշխող «Վրացական երազանք» կուսակցության նախագահ Իրակլի Կոբախիձեն Ուկրաինային և տեղի ընդդիմությանը մեղադրել է Թբիլիսին ռազմական հակամարտության մեջ ներքաշելու ցանկության մեջ՝ միաժամանակ առաջարկելով այդ հարցով հանրաքվե անցկացնել, եթե Վրաստանի «բնակչության մեծամասնությունը ցանկանում է կռվել մինչև վերջին վրացին»։

Հարցին, թե կգնա՞ Թբլիսին նման ծայրահեղ քայլի, վրացագետ Ջոնի Մելիքյանը ԼՈՒՐԵՐ․com-ի հետ զրույցում նկատեց․

«Ի սկզբանե Ուկրիանայի ճգնաժամը, Ռուսաստանի և Արևմուտքի հակասությունները բարդ վիճակի մեջ դրեցին Վրաստանը։ Այս ամենին գումարվել էր նաև Սաակաշվիլիի գործոնը, նրա ուկրաինական աջակիցների հակաթբիլիսյան քարոզչությունը և ակտիվությունը։ Եվ այս ֆոնի վրա լուրջ ներքին ու արտաքին քաղաքական ճնշում եղավ Վրաստանի իշխանությունների վրա և՛ երկրի ընդդիմությունից, և՛ Կիևի վրացական շրջանակներից, և՛ Ուկրաինայի իշխանությունների կողմից և այլ պետություններից,։ Այդ ճնշման նպատակն այն էր, որ ռուս-ուկրաինական հակամարտության մեջ Թբիլիսին դիրքավորվի, մինչդեռ իրականում Վրաստանը դիրքավորվել է և Ուկրաինայի կողմից է»։

Մեր զրուցակցի պնդմամբ, այլ հարց է, որ Վրաստանի աջակցությունը եղել է առավելապես քաղաքական․ տարբեր հարթակներում, Եվրախորհուրդ, ՄԱԿ և այլն, երկրի պաշտոնական ներկայացուցիչները քվեարկել են Ուկրաինայի օգտին։ Բացի այդ, ըստ Մելիքյանի, Վրաստանը նաև աջակցեց և ընդունեց ՌԴ-ի դեմ համընդհանուր պատժամիջոցները, թեպետ պետական մակարդակում հատուկ սանկցիաներ չկիրառեց, իր ազգային շահերից ելնելով, ինչն էլ դարձավ ներքաղաքական դիսկուրսի առիթ։

«Վրաստանը խոստովանում է, որ ունի տարածքային ամբողջականության խնդիր և այդ հարցում կոնկրետ մեղադրանքներ ունի Ռուսաստանի հասցեին, բայց նախընտրում է հարցը կարգավորել դիվանագիտական ճանապարհով։ Ուստի երկրի իշխանությունները չեն հրապուրվի ստեղծված իրավիճակով, կգնան դիվանագիտական կարգավորման ճանապարհով և որպես «երկրորդ ճակատ» չեն ներքաշվի ՌԴ-ի դեմ պատերազմի մեջ։ Վրաստանի ընդդիմությունն էլ, ըստ էության, կշարունակի Բրյուսելին և Վաշինգտոնին լարել երկրի իշխանությունների դեմ»։

Ինչ վերաբերում է Կոբախիձեի հայտարարությանը, վրացագետը նշեց, որ դա, ինչպես նաև ընդդիմության քայլերը ներքաղաքական պայքարի մի մաս են, որով փորձում են ընդգծել նաև իրենց ժողովրդավար լինելը, ժողովրդի հետ խնդրահարույց հարցերի շուրջ բաց խոսակցություն վարելը։ Իրականում ոչ մի ժողովուրդ չի ցանկանում պատերազմել և ՌԴ-ի հետ հնարավոր պատերազմի մեջ ներքաշվելու հարցով հանրաքվեի հարց չի առաջանա, եզրափակեց Ջոնի Մելիքյանը։

Արա Ալոյան