Հեղափոխականներից՝ բաժնետերեր. ովքեր են առևտրային գործունեություն ծավալող պաշտոնյաները

Ինչպես գիտենք՝ պաշտոնյաներն այսուհետև պետք է ներկայացնեն ոչ միայն եկամուտների, այլ նաև ծախսերի հայտարարագիր: Ուշագրավ է, սակայն, որ հայ պաշտոնյաները չեն շտապում կատարել օրենքի այս պահանջը, մի շարք պաշտոնաթող նախարարներ ընդհանրապես պաշտոնը դադարեցնելու օրվա դրությամբ հայտարարագիր չեն ներկայացրել, ինչն օրենքի խախտում է: Նորամուծություններից մյուսն էլ առևտրային այս կամ այն կազմակերպություններում մասնակցության ֆիքսումն է: Այս հարցում պաշտոնյաներն ավելի թափանցիկ են գործել, միևնույն ժամանակ, հարցերը դրանից չեն պակասում, քանի որ գործ ունենք ակնհայտ կոռուպցիոն ռիսկերի հետ:

Դիցուք՝ պատգամավոր Գուրգեն Արսենյանը այս ցանկում նշել է ՝ «Արսօյլ» ՓԲԸ, «Յունիքորն Ֆլորա» ՓԲԸ, «Յունիքորն փրինթ» ՓԲԸ, «Յունիքորն քոնսթրաքշըն» ՓԲԸ, «Յունիքորն գրուպ» ՓԲԸ, «Յունիքորն սերվիս» ՍՊԸ, «Էլդորադո-Արմեն» ՍՊԸ, «Վկրեդիտ 24» ՍՊԸ:

ՀՀ Արագածոտնի մարզի Աշտարակ համայնքի ավագանու անդամ Վահե Մովսիսյանը հայտարարագրել էր «ՍԳՈ ԵՎ ՀՈՒՂԱՐԿԱՎՈՈՒԹՅՈՒՆՆԵՐԻ ԲՅՈՒՐՈ» ՍՊԸ-ի 100 տոկոս բաժնեմաս:

Տավուշի մարզպետի տեղակալ Նարեկ Ղուշյանը հայտարարագրել է ԱՁ «Նարեկ Ղուշչյան» ընկերության 100 տոկոս բաժնեմաս:

Վարչապետի աշխատակազմի ղեկավարի տեղակալ Բագրատ Բադալյանը կնոջ հետ համատեղ տուն է գնել Ամերիկայի Միացյալ նահանգների Մերիսվիլ քաղաքում: Պաշտոնյայի հայտարարագրի համաձայն՝ գործարքը կայացել է 2021թ.-ի մայիսին, իսկ անշարժ գույքի արժեքը կազմել է 584 հազար 950 ԱՄՆ դոլար: Բագրատ Բադալյանի եկամուտներն ավելացել են հատկապես պետական պաշտոններ զբաղեցնելու տարիներին: Մասնավորապես, նրան է պատկանում «Ճաննախագիծ ինստիտուտ» ՍՊԸ-ի 88.13%-ը: Այս ընկերությունն ակտիվ մասնակցություն ունի պետական գնումներում՝ հատկապես ճանապարհաշինության ոլորտում:

Պատգամավոր  Էդուարդ Աղաջանյանը 50 տոկոս բաժնեմաս ունի «Էքսիփէդ» ՍՊԸ-ում։ Ընկերությունը զբաղվում է հանրային սննդի կազմակերպման գործունեությամբ։

Պատգամավոր Տրդատ Սարգսյանը  2020-ից  հանդիսանում է կրթական ծառայություններ մատուցող «Պրոմենադ» ՍՊԸ-ի սեփականատերը։

Առողջապահության նախկին նախարար Արսեն Թորոսյանը հայտարարագրել է «Բանկ Ասթրիայում» էլ ՝ 20,550 եվրոյի չափով ներդրում։

Ինչպես տեսնում ենք, չնայած հեղափոխությունից հետո հնչող հավաստիացումներին, որ նոր իշխանության ներկայացուցիչները որևէ առևտրային գործունեություն չեն ծավալելու, այնուամենայնիվ տեսնում ենք, որ պատկերը տրամագծորեն հակառակն է․  ՔՊ-ականները չեն կարողացել տեղի չտալ գայթակղությանը և, լավագույն ավանդույթները, շարունակելով որոշել են իրենց նվիրել առևտրային գործունեությանը, իսկ թե ինչ պոտենցիալ կոռուպցիոն ռիսկեր են թաքնված այս երևույթի հետևում՝ դատեք ինքներդ...