Ատոմ Ջանջուղազյանի «բացահայտումները» գրվում են սառույցին

Վերլուծական 19 Դեկտեմբեր, 2022 20:45

Այս տարվա մարտ ամսին Հաշվեքննիչ պալատի նախագահ էր ընտրվել ֆինանսների նախկին նախարար Ատոմ Ջանջուղազյանը: Դիտարկենք, թե այս ժամանակահատվածում ինչով է աչքի ընկել վերջինիս գլխավորած կառույցը:

Դիցուք՝ Ջանջուղազյանը նշանակումից գրեթե անմիջապես հետո հայտնի դարձավ, որ Հաշվեքննիչ պալատի ընթացիկ եզրակացության համաձայն՝ առողջապահության նախարարությունն ունեցել է 36 միլիոն 192 հազար 300 դրամի գերածախս: Նախարարության ներկայացուցչի պարզաբանմամբ՝ դա պայմանավորված է պլանավորվածից ավելի շատ անձանց արձակուրդ և արձակուրդային գումարներ տրամադրելու հետ, քանի որ նախորդ ժամանակահատվածում նրանք հնարավորություն չեն ունեցել արձակուրդ գնալ: Այս բացահայտումներն այնքանով են ուշագրավ, որ գաղտնիք չէ` ՀՊ ներկայիս նախագահ Ատոմ Ջանջուղազյանը և Արսեն Թորոսյանը, ում ղեկավարման ընթացքում էլ կատարվել է գերծախսը, բավական լարված հարաբերություններ ունեին այն ժամանակ, երբ երկուսն էլ դեռևս նախարարի պաշտոն էին զբաղեցնում։ Արսեն Թորոսյանն ակնարկում էր, որ Ջանջուղազյանը նախկին է և հակահեղափոխական, ինչպես նաև պահպանողական հայացքների կողմնակից։ Իսկ Ջանջուղազյանը դեմ էր արտահայտվել Թորոսյի գլխավոր նախագծին` առողջապահության հարկ ներմուծելուն` պնդելով, որ դա ավելացնելու է քաղաքացիների հարկային բեռը և, ընդհանուր առմամբ, անիմաստ և ծախսատար ծրագիր է, ինչի հետ, անշուշտ, Թորոսյանը չէր համաձայնվել, ինչն էլ հանգեցրել էր երկու նախարարների գժտվելուն։

Ստուգումներ էին ընթանում նաև Սյունիքի մարզպետարանում։ Նախկին մարզպետ Մելիքսեթ Պողոսյանին արդեն փոխարինելու է եկել Ռոբերտ Ղուկասյանը: Պալատի կողմից իրականացվել է մարզպետարանի կողմից պետական բյուջեի մուտքերի ձևավորման և ելքերի իրականացման կանոնակարգված գործունեության հաշվեքննություն: Դեռ պարզ չէ, թե ինչպիսի արդյունքների կբերեն այդ ուսումնասիրությունները, սակայն մամուլը բազմիցս էր գրել մարզպետարանում առկա խնդիրների մասին:

Ջանջուղազյանի թիրախում այս ընթացքում հայտնվեց նաև էկոնոմիկայի նախարարությունը: Պարզվել է, որ նախարարությունը պետական աջակցության ծրագրով սուբսիդավորվող վարկերը նախատեսվածից բարձր տոկոսադրույքով է տրամադրել ֆերմերներին:

Ինչպես երևում է` Հաշվեքննիչ պալատի նորանշանակ նախագահ Ատոմ Ջանջուղազյանը որոշել է սլաքները ուղղել իր թիմակիցների կողմը և վերհանել առաջին հերթին նրանց գերծախսերը և պարգևավճարները։ Մինչդեռ չմոռանանք, որ 44-օրյա պատերազմի օրերին հենց Ջանջուղազյանի ղեկավարած ֆինանսների նախարարությունում 73 միլիոն դրամի պարգևավճարներ են բաժանվել։ Շատ լավ է, իհարկե, որ մյուս գերատեսչությունները գտնվում են խոշորացույցի տակ, սակայն հետաքրքիր է` կհերիքի՞ Ատոմ Ջանջուղազյանի դուխը և օբյեկտիվությունը` ուսումնասիրելու նաև իր կողմից պատերազմի թեժ պահին բաժանած միլիոնների հիմնավոր լինելու փաստը, թե ոչ։