Արցախի շրջափակումը և լուռ ՀԿ-ները. ուր են գնում հազարավոր դոլարների հասնող դրամաշնորհները

Բերձորի միջանցքի շուրջ ստեղծված իրավիճակին արձագանքել են բազմաթիվ միջազգային կառույցներ, թեև Արցախի փաստացի շրջափակումը դեռևս վերացված չէ, սակայն պետք է փաստել, որ միջազգային հանրությունը առնվազն փորձում է հասցեական կոչեր հղել և բարձրացնել արցախցիների խախտվող իրավունքների հարցերը:

Մինչդեռ զարմանալիորեն պասիվ են հայկական ՀԿ-ները, որոնց բուն գործունեությունն է հենց ենթադրում ստեղծված իրավիճակի լայն լուսաբանում, իրազեկում, քանի որ վերջիններս ուղղակիորեն կամ անուղղակիորեն լծված են են մարդու իրավունքների պաշտպանության գործին: Սակայն, մինչ օրս լավագույն դեպքում շաբլոնային հայտարարությունների ենք ականատես եղել, ինչը, անշուշտ, բավարար չէ: 

Այս համատեքստում ուսումնասիրել ենք, թե որքան դրամաշնորհ են ստացել անցնող տարվա ընթացքում՝ մարդու իրավունքների համար պայքար մղող ՀԿ-ները:

Եվ այսպես՝ 160 հազար դոլարի դրամաշնորհ է ստացել Դեմոլաբ տեղեկատվական կենտրոնը: Ծրագրի նպատակն է աջակցել Factor.am լրատվամիջոցին` ապահովելու համապարփակ և վերլուծական լուսաբանում Հայաստանում քաղաքականության հիմնախնդիրների և քաղաքացիների կարիքների մասին` համոզվելով, որ ճգնաժամի ժամանակ այդ հարցերը չեն մղվում հանրային խոսակցության լուսանցք: Factor.am կայքի ղեկավարը Արևհատ Սահակյանն է, կայքն էլ հաճախ անվանում են սորոսական:

«Հանրային լրագրության ակումբ» ՀԿ-ն ստացել է 52,500 ԱմՆ դոլար: ՀԿ-ի ղեկավարը Սեդա Մուրադյանն է: Դրամաշնորհը նպատակ ունի աջակցել «Մեդիա կենտրոն»-ի հարթակին՝ քննարկելու Հայաստանի կարևորագույն խնդիրները հարցազրույցների, ասուլիսների և այլ հանրային միջոցառումների միջոցով: ՀԿ-ն բավական ակտիվ կերպով քննադատում է և արձագանքում մամուլի դեմ ուղղված իշխանությունների ոտնձգություններին:

«Առաջընթաց Գյումրի» քաղաքացիական հասարակության զարգացման կենտրոն (Progress Gyumri, Civil Society Development Center)-ը ստացել է 10.700.00 ԱՄՆ դոլարի դրամաշնորհ: Ծրագիրը նպատակ ունի մեծացնել «Գյումրու «Պրոգրես» քաղաքացիական հասարակության զարգացման կենտրոն» ՀԿ-ի մեդիա հնարավորությունները, որպեսզի այն կարողանա լուծել Շիրակի մարզում առկա մարդու իրավունքների կարևորագույն խնդիրները, համակողմանի լուսաբանել տարածաշրջանի զարգացումները և ունենալ ավելի լայն տարածում:

«Իրավունքների պաշտպանություն առանց սահմանների» ՀԿ-ն, որի ղեկավարը Արաքս Մելքոնյանն է այս տարվա դեկտեմբերի 1-ին ստացել է 76,900 ԱՄՆ դոլար: Բայց, չգիտես ինչու, չեն շտապում անդրադառնալ Արցախում մարդու իրավունքների կոպտագույն ոտնահարումներին:

«Վերադարձ դեպի Դիզակ» ՀԿ-ն, որի ղեկավարը Մարգարիտա Քարամյանն է, նախորդ ամիս ստացել է 25,000 ԱՄՆ դոլարի դրամաշնորհ: Նպատակն էլ՝ Հադրութից տեղահանված անձանց իրավունքների պաշտպանությունն է: 

Ստացվում է, որ չնայած բավական լուրջ ֆինանսավորման՝ մինչ այս պահը այս և մյուս ՀԿ-ները հավուր պատշաճի չեն արձագանքել Արցախում տեղի ունեցող մարդու իրավունքների զանգվածային խախտման դեպքերին: