Անչափահասները հայտարարատու չեն լինի. փոփոխություն՝ հայտարարագրման համակարգի ներդրման նախագծում

Հայաստանում 2023 թվականից կներդրվի եկամուտների համընդհանուր հայտարարագրման համակարգը, 2026-ից արդեն ՀՀ բոլոր չափահաս քաղաքացիները կհայտարարագրեն իրենց եկամուտները, անչափահասները հայտարարատու չեն լինի:  

Հայաստանի Հանրապետության հարկային օրենսգրքում փոփոխություններ եւ լրացումներ կատարելու մասին և Վարչական իրավախախտումների վերաբերյալ Հայաստանի Հանրապետության օրենսգրքում փոփոխություն եւ լրացում կատարելու մաuին օրենքների նախագծերի փաթեթը երկրորդ ընթերցմամբ խորհրդարանի քննարկմանը ներկայացրեց ՀՀ ֆինանսների փոխնախարար Արմեն Պողոսյանը:

Նախագծով առաջարկվում է համակարգի ներդրումն իրականացնել 3 տարվա ընթացքում՝ սկսած 2023 թվականից: Հարկային առաջին տարին, որի համար կներկայացվեն հայտարարագրեր, կլինի 2024 թվականը: Առաջինից երկրորդ ընթերցմամբ քննարկման ընթացքում երեք խումբ անձանց համար առաջարկվել է հայտարարագրման առաջին տարի սահմանել ոչ թե 2023  թվականը, այլ 2025 թվականը: «Այդ անձինք ենք արտագնա աշխատանքից եկամուտ ստացող ռեզիդենտ քաղաքացիները, հիփոթեքային վարկի սպասարկման տոկոսների չափով եկամտային հարկի վերադարձ ստացող քաղաքացիները և նոտարները: Առաջարկվել է նաև, որ հայտարարատուների շրջանակից առհասարակ դուրս բերվեն անչափահասները»,-ասաց Պողոսյանը:

Նախատեսվում է հայտարարագրման համակարգին զուգահեռ ներդնել նաև խթանող միջոցառումներ՝ սոցիալական կրեդիտներ: Քաղաքացին որոշակի փոխհատուցում կստանա կրթության, առողջապահության ոլորտում իրականացվող ծախսերի դիմաց: Եթե առաջին ընթերցմամբ սահմանվում էր, որ հիփոթեքային վարկի սպասարկման գծով եկամտային հարկի չափով տոկոսների վերադարձ ստացող քաղաքացիները չեն կարող հավակնել սոցիալական ծախսերից օգտվելուն, ապա երկրորդ ընթերցմամբ այդ սահմանափակումը հանվել է:

Հայտարարագիրը չլրացնելու դեպքում նախատեսված է պատասխանատվության միջոց՝ տուգանք: 

ԱԺ տնտեսական հարցերի հանձնաժողովի փոխնախագահ Բաբկեն Թունյանը պարզաբանեց, որ եկամուտների հայտարարագրման համակարգով արտագնա աշխատողները չեն հարկվելու: «Իսկ ովքեր դրսից եկամուտներ են ստանում՝ կլինեն դրսում աշխատողներ՝ շինարարության կամ այլ ոլորտներում, կլինեն Հայաստանում «ֆրիլանսով» աշխատող ծրագրավորողներ, 1 մլն դրամ եկամուտի դեպքում ստիպված չեն լինի ոչ տեղեկանք ներկայացնել, ոչ էլ դրա համար լրացուցիչ հարկեր վճարել»,-ասաց պատգամավորը:

Նախագծով որևէ չհարկվող եկամուտ չի նախատեսվում դարձնել հարկվող: