Քրդերը Թուրքիային մեղադրում են Փարիզում տեղի ունեցած հրաձգության կազմակերպման մեջ

Փարիզի քրդական համայնքի ներկայացուցիչները կարծում են, որ Ֆրանսիայի մայրաքաղաքում տեղի ունեցած հրաձգության հետևում Թուրքիան է կանգնած, դեպքի վայրից հայտնում է ՌԻԱ Նովոստիի թղթակիցը։

«Հրաձգությունը տեղի է ունեցել քրդական մշակութային կենտրոնում: Սա ակնհայտ հարձակում է քրդերի դեմ: Մենք կարծում ենք, որ դրա հետևում կանգնած են Թուրքիան և Էրդողանը»,- գործակալությանը տված հարցազրույցում ասել է քրդական համայնքի ներկայացուցիչը:

Ոստիկանության կողմից շրջափակված դեպքի վայրում հավաքվել են մի քանի տասնյակ քրդեր։ Նրանք բոլորը վանկարկում են հակաթուրքական կարգախոսներ։ Համայնքի ներկայացուցիչները կազմակերպել են ինքնաբուխ հանրահավաք։

«Հրաձգության հետևանքով երեք քուրդ է զոհվել: Քրդական մշակութային կենտրոնը, որտեղ տեղի է ունեցել հարձակումը, ոչ մի կերպ չի պահպանվել, ցանկացած մարդ կարող էր գնալ այնտեղ», - ասել է աղբյուրը:

Այսօր Փարիզի կենտրոնում 69-ամյա տղամարդը հրաձգություն է սկսել, որի հետևանքով երեք մարդ է մահացել, ևս 4 մարդ՝ վիրավորվել: Վիրավորներից երկուսի վիճակը ծայրահեղ ծանր է:

Ոստիկանները ձերբակալել են կասկածյալին՝ առանց նրա կողմից դիմադրության: Հրաձգության շարժառիթի կամ թիրախի մասին առայժմ ոչինչ հայտնի չէ: Նշվում է, որ կասկածյալը ֆրանսիացի է և նախկինում ոստիկանությանը հայտնի է եղել երկու մահափորձերի առնչությամբ:

Ականատեսները հայտնել են, որ 7-8 կրակոց են լսել: Դեպքը տեղի է ունեցել Château d'Eau մետրոյի կայարանի մերձակայքում, որտեղ գտնվում է քրդական մշակութային կենտրոն, մի շարք ռեստորաններ և խանութներ:

Ֆրանսիայի ներքին գործերի նախարար Ժերալդ Դարմանինը մեկնել է դեպքի վայր: