Բժիշկը զգուշացրել է մանկական շամպայնի վտանգների մասին

Մանկական շամպայնը ավելի լավ է չտալ հինգ տարեկանից փոքր երեխաներին։ Ըմպելիքը փչացնում է ատամները և շատ շաքար է պարունակում։ Այս մասին ՌԻԱ Նովոստիին հայտնել է Մոսկվայի առողջապահության դեպարտամենտի գլխավոր մանկաբույժ Իսմայիլ Օսմանովը։

Ամանորի գիշերը մանկական շամպայնի մեկ բաժակը էական վնաս չի հասցնի առողջությանը, սակայն ավելի լավ է չչարաշահել քաղցր գազավորված ըմպելիքը։ Մանկաբույժի խոսքով՝ ըմպելիքը չափից շատ շաքար է պարունակում։

«Ածխածնի երկօքսիդի հետ զուգակցված շաքարն արագ ներծծվում է՝ բարձրացնելով գլյուկոզայի մակարդակը, որը մարմինը չի կարող ճիշտ օգտագործել: Գազը և կիտրոնաթթուն գրգռում են աղեստամոքսային տրակտի լորձաթաղանթը։ Ներկանյութերն ու կոնսերվանտները կարող են ալերգիկ ռեակցիա առաջացնել»,- զգուշացրել է բժիշկը։

Օսմանովը խորհուրդ է տալիս ամանորյա գազավորված ըմպելիքը փոխարինել տնական մրգային ըմպելիքներով կամ լիմոնադներով՝ քիչ շաքարով։ Կարելի է նաև երեխային առաջարկել ջրով նոսրացված հյութ։