Գիտնականները ստեղծել են վիրուսներից պաշտպանող շրթներկ

Իսպանիայի «Սուրբ Վինսենթ» կաթոլիկ համալսարանի գիտնականները մշակել են լոռամրգի շրթներկ, որը կարող է պաշտպանել այնպիսի վիրուսներից, ինչպիսիք են կորոնավիրուսը, գրիպը և Էբոլան: Արդյունքները հրապարակվել են ACS Applied Materials and Interfaces-ում:

Քանի որ փորձագետները մտավախություն ունեն, որ SARS-CoV-2-ը տարիներ շարունակ կշրջանառվի բնակչության շրջանում գրիպի վիրուսի հետ մեկտեղ, գիտնականները հուսով են, որ շրթներկը կարող է դիմակի նորաձև այլընտրանք դառնալ:

Լոռամրգի էքստրակտի վերաբերյալ նախկին հետազոտությունները ցույց են տվել, որ այն ունի հակամանրէային հատկություն և պաշտպանում է լնդերի ինֆեկցիայի պատճառ հանդիսացող պաթոգեններից և այլ վիրուսներից: Գիտնականների կարծիքով՝ լոռամրգի բուժիչ հատկությունները պայմանավորված են մրգի մեջ պարունակվող պոլիֆենոլներով, որոնք փոխազդում են վիրուսների թաղանթների հետ և փոխում դրանց գլիկոպրոտեինները՝ ապաակտիվացնելով դրանք։

Հետազոտողները խառնել են լոռամրգի էքստրակտը յուղալի շրթներկի հիմքի հետ, որը բաղկացած է շիայի յուղից, վիտամին E-ից, պրովիտամին B5-ից, բաբասուի յուղից և ավոկադոյի յուղից՝ շրթներկի խորը կարմիր երանգ ստեղծելու համար։ Հետազոտողները ցույց են տվել, որ շրթներկը վիրուսների հետ շփվելուց մեկ րոպե չանցած՝ այն դադարեցրել է նրանց բազմացումը։

Շրթներկը կիրառելուց հետո հինգ ժամվա ընթացքում բոլոր պաթոգենները զգալիորեն թուլացել են: