Ուզբեկստանում հազի դեմ դեղամիջոցից 18 երեխա է մահացել

Ուզբեկստանում քրեական գործ է հարուցվել հազի դեմ հնդկական դեղամիջոցից 18 երեխայի մահվան փաստով։

Ուզբեկստանի պետական ​​անվտանգության ծառայությունը հայտնել է, որ երեխաները մահացել են հնդկական Marion Biotech ընկերության մշակած Doc-1 max դեղամիջոցն ընդունելուց հետո։

Պետական ​​անվտանգության ծառայության քննչական վարչությունը քրեական գործ է հարուցել ներմուծող «Քուրամաքս բժշկական» ՍՊԸ-ի և «Դեղերի ստանդարտացման գիտական ​​կենտրոն» ՍՊԸ-ի պաշտոնատար անձանց նկատմամբ՝ Քրեական օրենսգրքի 186-3-րդ հոդվածի 4-րդ մասով։

Դեկտեմբերի 22-ին Ուզբեկստանը ժամանակավոր արգելք է դրել հնդկական Doc-1 Max դեղամիջոցի վաճառքի վրա։

Դեկտեմբերի 27-ին Ուզբեկստանի առողջապահության նախարարությունը հրապարակել է ստուգման արդյունքները, որը հաստատել է 18 երեխայի մահը հնդկական դեղամիջոց ընդունելուց հետո։